Qalay İslâm ilimleri medresesiniñ qızlar bölüginde “Şahsiy potentsial ve onıñ qullanıluvı” mevzusında seminar keçirildi.
Seminarnıñ alıp barıcısı ilâhiyatçı-ruhiyatçı, Qırım MDİ “Faydalı ilim” maarif leyhasınıñ reberi Zeyneb Bairova iştirakçilerni muvafaqiyetniñ ruhiy şartları ile tanış etti, şahsiy potentsialnı ögrenmek içün, bazı qaidelerni seslendirdi, maqsatqa irişkende, ögünde olğan problemlerni nasıl etip yeñmek kerek olğanı ve şahsiyetniñ inkişafına keder etken manialar aqqında tarif etti. Seminar iştirakçileri Qırımda yaşağan yaş müsulmanlarnıñ faalliginiñ müimligini muzakere etti ve şahsen olar millet ve cemiyetke nasıl fayda ketirebilecegi mevzusında fiikr yürüttiler.
Zeyneb Bairovanıñ sözlerine köre, seminar faal subet şekilinde olıp keçti, er bir talebe ocağa sualini berebildi.
Zeyneb Bairova: “Studentler ğayet faal oldı, bir sıra suallerni berdi, yani müsulman yaşları añlı olaraq ileri adım atıp, cemiyetimizge çoq fayda ketirmege istey! QMDİ vazifesi ise – teşebbüske qol tutmaq ve onı ömürge keçirmege yardım etmektir”, – dep ayttı.
Qalay medresesinde lektsiya ve seminarlar Qırım müsulmanları Diniy idaresiniñ ocaları tarafından daimiy sürette alıp barıla.
QMDİ matbuat hızmeti
