Qırım Müftiligi iş adamları ve göñüllilerniñ destegi ile Aqmescitteki №1 tahqiqat izolâtorında bulunğan tahqiqattan keçkenler ve mahkümler içün ananeviy hayriye aktsiyasını keçirdi.
Aqmescitniñ baş imamı, Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı Muhammed İslamov ve onıñ yardımcısı İbraim Zinedinov №1 tahqiqat izolâtorına aşayt mahsulatları, suv, sebze ve meyvalarnı, tatlılıqlarnı ketirdiler.
Bundan da ğayrı, musulmanlarnıñ büyük Oraza bayramı munasebetinen eki biñ mahküm içün pilâv pişirildi.
Muhammed İslamovnıñ sözlerine köre, çeşit penitentsiar müessiselerinde qapalğan insanlar içün de bayramlarnı teşkil etmek kerek. Çünki bayram insanlarnı birleştire ve güzel kelecekke ümüt bere.
“Qırım Müftisi ve Qırım musulmanları diniy idaresi adından biz tahqiqat izolâtorında bulunğan musulmanlarnı hayırlap, olarğa sağlıq, qaviy iman, sabır tiledik, tezce qorantalarına qavuşıp, doğru yolnı saylamaları, belâlar olardan uzaq olması içün dua ettik”, – dedi Muhammed İslamov.
Bundan da ğayrı, o, Qırım Müftisi adından QC ve Sevastopol şeeri boyunca Rusiyeniñ ÜFSİN-i başlığı Vadim Bulgakov, QC ve Sevastopol şeeri boyunca Rusiyeniñ ÜFSİN-i başlığınıñ inançlılar ile çalışuv boyunca yardımcısı Roman Tsurkan ve tahqiqat izolâtorınıñ rehberi Pötr Sinükovğa bayramnı teşkil etmege yardım etkenleri içün, ve iş adamları, göñüllilerge de apis etilgenlerge hayriye aktsiyasınıñ keçirilüvine yardım qolunı uzatqanları içün teşekkürler bildirdi.
Bayram künleri böyle hayriye aktsiyalarınıñ Aqmescit ve Keriçteki ÜFSİN müessiselerinde keçirilmesi planlaştırıla.
Qırım MDİ matbuat hızmeti
