Aqmeçit (Çernomorskoye) rayonınıñ Kerleut (Vodopoynoye) köyüniñ camisinde kelecek suvuqlarğa evelden azırlıq köreler. Bu künleri mütehassıslar camide sıcaq zemin sistemasını elektrik ağına qoştılar.
Sistema ta 10 yıl evelsi yapılğan edi, amma 3 fazalı sayğaç olmağanı sebebinden onı elektrik ağına qoşulması imkânsız edi, ve musulmanlar ibadetlerini suvuq binada keçirmege mecbur ediler.
Bu sene Kerleut köyüniñ sakinleri ve rayonnıñ lâqayd qalmağan sakinleri 3 fazalıq sayğaçnıñ işke kirsetilüvi ve resmiyleştirilüvi içün para topladılar. Artıq suvuqlarda cami sıcaq olacaq.
Hatırlatamız, camide İslâm temelleri ve Quran oquvı dersleri de alıp barıla.
Kerleut köyüniñ camisi tahminen XVIII asırnıñ başında quruldı. 1929 senesiniñ soñunda, ibadetler toqtatıldı ve cami qapaldı. Bundan soñ, cami binası himiya maddeleriniñ saqlanılması içün anbar olaraq qullanıldı. 1944 senesi, qırımtatarlar Qırımdan sürgün etilgen soñ, yerli kommunistler caminiñ minaresini yıqtılar, cami yanındaki mezarlıqnı da bozdılar.
90-nci seneleri Kerleut camisi ğayrıdan çalışıp başladı, minaresi ğayrıdan quruldı, cami yerli din cemiyetine qaytarıldı.
Qırım MDİ matbuat hızmeti
