Qırım Müftisi Qarasuvbazar şeerine ve rayonına iş ziyareti ile bardı.
İş ziyareti sırasında Müfti efendi Qırım Cumhuriyetiniñ milletlerara munasebetler boyunca devlet komitetiniñ başlığı Ayder Tippa, Qırım Müftisiniñ muavini Esadullah Bairov, Qarasuvbazar rayonınıñ baş imamı Seyar Abdulğaniyev ile beraber azizler mezarları olğan şeer parkına bardılar. Şu yerde azizler Osman Devletli, Silve Devletli (IX asır) ve Ümer Devletliniñ (XII asır) mezarları bulunmaqta.
Rayon imamı Azizlerniñ abadanlaştırıluv leyhasınıñ yerli akimiyetnen uyğunlaştırıluvı ve onıñ ömürge keçirilmesi aqqında tarif etti.
Al-ı azırda şeer memuriyeti şeer parkınıñ abadanlaştırıluvı işlerini keçire. Ara yolçıqlarnıñ doğrulanması, yarıqnıñ keçirilmesi, yeşertüv, koşklerniñ, kiçik mimariy unsurlarnıñ ve çeşmeniñ qurulması közde tutula. Bundan da ğayrı, Azizler yerinde diniy ananelerge uyğun hatıra abideniñ qoyulması planlaştırıla.
Hatırlatamız, Qırım başlığı Sergey Aksönov Qarasuvbazar şeer parkını 2021 senesi iyunniñ soñuna qadar abadanlaştırmağa avale etti.
Bundan da ğayrı, Qırım Müftisi parknıñ yanında, şeerniñ merkez soqaqlarınıñ birinde yerleşken sürgünlik qurbanları hatırasına bağışlanğan abideniñ qoyulmasınen bağlı vaziyetni ögrendi.
Qırım MDİ matbuat hızmeti
