Qazan şeerinde Cuma cami külliyesiniñ qurucılığı başlağanını bildirgen hatıra taşınıñ tantanalı qoyuluvı merasimi olıp keçti. Tedbirde Qırım ve Sevastopol Müftisiniñ muavinleri Ayder İsmailov ve Esadullah Bairov, Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatı) neşriyat bölüginiñ rehberi Emir-Asan Ümerov iştirak ettiler.
Hatıra taşında eykeltıraş Zulfiya Muhameddânova işlegen levhaları qoyulacaq, üstlerinde ise, arap, rus, tatar ve ingliz tillerinde aşağıdaki yazılar olacaq: “İtil boyu Bulğarnıñ İslâmnı qabul etüviniñ 1 100 yıllığı munasebeti ile Cuma caminiñ qurucılığı başlaması munasebetinen”.
Tedbirde “Rusiye – İslâm dünyası: KazanSummit 2022” XIII halqara iqtisadiy forumınıñ vekilleri, “Rusiye – İslâm dünyası” strategik baqışınıñ taqımı, Tatar din erbapları Bütünrusiye forumınıñ 1 100 vekili, cemaatçılıq vekilleri, cumhuriyetniñ sakinleri ve musafirleri iştirak etti.
Tatarstan Cumhuriyetiniñ Müftisi Kamil hazrat Samigullin cuma hutbesini ve namazını keçirdi, bundan soñ Cuma caminiñ qurucılığı başlamasını bildirgen hatıra taşınıñ qoyuluvı merasimi olıp keçti.
İhtar. Cami qurucılığınıñ teşebbüçisi – Tatarstan Cumhuriyeti musulmanları diniy idaresidir. Teşebbüs müim tarihiy vaqia olğan İtil boyu Bulğarnıñ İslâmnı resmiy olaraq qabul etüviniñ 1 100 yıl dönümine doğrulanğan. Devlet Prezidentiniñ emiri ile işbu tarih devlet seviyesinde qayd etile.
Cuma cami Kazanka özeniniñ güzel yalısında, Qazan qalesiniñ surları qarşısında yerleşecek. Cami 10 biñ insan içün qararlaştırılğan. Cami İtil özeninden ve şeer tarafından yahşı körünip, şeer alanında belli oriyentir olacaq. Caminiñ temeline Bulğardan ketirilgen qadimiy taşlarnıñ yerleştirilmesi planlaştırıla.
“Caminiñ YÜNESKO qoruması astında buluğan şeer qalesiniñ qarşısında yerleşüvi – keçmişke baqqan qadimiy qaleniñ kelecekke baqqan yañı cuma caminen mimariy dialogını peyda ete”, – dep, qurulacaq caminiñ yerleşüv hususiyetini mimarcılıq doktorı, Mimarcılıq ve dizayn İnstitutınıñ professorı Galina Aydarova añlattı.
Aprel 1 künü Cuma caminiñ mimariy kontseptsiyasınıñ işlenmesi boyunca yarış ilân etildi. Yarış jürisiniñ terkibine yetekçi mimarcılar, ilmiy cemiyetniñ temsilcileri, musulman din hadimleri, devlet ve münitsipal akimiyeti organlarınıñ temsilcileri kirdi. Yarışnıñ neticeleri üç aydan soñ, Qurban bayramı arfesinde ilân etilecek.
2022 senesi, Tatarstan Prezidentiniñ fermanı ile, cemiyetniñ maneviy-ahlâqiy inkişafı, Tatarstan halqlarınıñ urf-adetlerini saqlamaq maqsadınen cemiyetniñ maneviy-aqlâqiy inkişafına destek “İgelek – Eyilik” Cumhuriyet fondu meydanğa ketirildi. Nezaret şurasınıñ başlığı R. N. Minnihanov oldı. Fondnıñ vazifelerinden biri – cemiyetniñ maneviy terbiyesi içün qullanılğan obyektlerniñ qurucılığı, ğayrıdan tiklenilüvine maddiy destek köstermektir.
İşbu faktornı köz ögüne alıp, Fond Cuma cami qurucılığınıñ sımarlayıcısı olacaq. Esas qurucı şirket böyle obyektlerniñ qurucılığında büyük tecribesi olğan OOO “Yevrostroyholding+” şirketi olacaq.
Qırım MDİ matbuat hızmeti