Qırım Cumhuriyeti ve Sevastopol şeeri musulmanları diniy idaresiniñ hadimleri XVIII Qazan halqara musulman kinosı festivalinde iştirak etip, anda “Müfti. Dua ile” vesiqalı bediiy filmni “Hususiy vaqia” nomenatsiyasında taqdim ettiler. İşbu film Qırım Cumhuriyeti ve Sevastopol şeeri musulmanları diniy idaresiniñ 30 yıllığı ve 1999 senesinden başlap, qırımtatar halqı ve bütün Qırım musulmanlarınıñ eyiligi oğurında çalışqan Müfti hacı Emirali Ablayevniñ 60 yıllığına bağışlandı.
“Qırım musulmanlarınıñ diniy yetekçisi hacı Emirali Ablayevniñ ayatı er bir semetdeşimizniñ başından keçirgeni vaqialarnen toludır. Müftiniñ aqranları em ğurbetlikteki yaşayışnı, em uzun ve zorlu Vatanğa avdet yolunı, em de tuvğan topraqlarda tiklenüv yıllarını hatırlay”, – dep qayd etti filmniñ baş prodüseri Zenife Ablayeva.
Bu sene festivalge dünyanıñ 44 devletinden 600 ziyade ariza keldi. Yarışnıñ programmasına ise, 50 film kirdi, olarnıñ arasından jüri azaları ğaliplerni sayladılar. “Hususiy vaqia” nominatsiyası İtil boyu Bulğarnıñ İslâmnı qabul etüviniñ 1 100 yıllığına bağışlandı.
Hatırlatamız, ilk kere “Müfti. Dua ile” filmi Aqmescitte, Qırım Cumhuriyeti Devlet akademik muzıkalı teatrinde qapalı numayışta taqdim etilgen edi.
İhtar: XVIII Qazan halqara musulman kinosı festivali sentâbr 7-11 künleri Tatarstan Cumhuriyetiniñ Prezidenti Rustam Minnihanov ile Rusiye Medeniyet nazirliginiñ destegi ve “Rusiye – İslâm dünyası” stratejik baqış taqımınen işbirlikte keçirildi.
Qırım MDİ matbuat hızmeti