“Ürmetli dindaşlar! Sayğılı vatandaşlar!
Yüce Allahnıñ iradesi ile bugün küneşniñ qavuşmasınen mubarek Ramazan ayı başladı! Eyilikler yapılğanı, maneviy taraftan arınğanımız, ömürimizniñ manası aqqında tefekkür etkenimiz, imanımıznıñ qaviyleşkeni ve Yaratıcımızğa tevekkül etkenimiz ay başladı!
Aynı Ramazan ayında Quran-ı Kerim endirilmege başlap, Muhammed peyğamberimizniñ (s.a.s.) peyğamberlik vazifesi başladı. Biz bütün yıl devamında musulmanlarnıñ sabırsızlıqnen beklegenleri ayğa qavuşqanımızdan sebep can-göñülden sevinemiz! Ramazan – on bir aynıñ sultanıdır.
Quranda böyle buyurıla: “Bismillâhi’r-rahmani’r-rahim. “Ey, iman etkenler! Sizden evelkilerine emir etilgeni kibi, oraza sizge de emir etildi, belki, siz saqınırsıñız” (“Baqara” suresi, 2/183).
Oraza musulmanlar içün farzdır. Ramazan orazası ile imanımız, yüreklerimizniñ merhametligi, niyetlerimizniñ temizligi ve amellerimizniñ eyiligini sınala. Oraza, onıñ içün berilgen büyük mukâfat tüşünilgende, er daim qolay keçe.
Rabbimiz bizge sabırlı, küçlü ve birlik olmamıznı emir ete. Ramazan ayınıñ er bir anı qıymetlidir, buña köre onı Allah ögünde mesülietlerimizni farq etip keçirmek kerekmiz.
Unutmañız, tek samimiy iman ve ihlâs ile yapılğan eyi ameller cennet qapılarını açar. İbadetlerimizni ancaq Allah içün yapmalı, orazamıznı ancaq Allah içün tutmalı.
Bundan da ğayrı, Ramazan ayı bizge ömürimiz aqqında tüşünmek ve doğru yolğa turmaq içün berildi. Ramazan – tefekkür, ğayret, teslimiyet ve Rabbimizden kelgen ikramlar zamanıdır!
Dindaşlarımıznıñ Ramazannı ibadetlernen, orazalarnen, teravih namazlarınen, Quran oqup, sadaqa berip keçirmelerini tileymiz. Yüce Rabbimiz ibadetlerimizni eñ güzel şekilde keçirmege yardımcı olsun.
Biz er daim yaqınlarımız, halqımız, ümmetiz ve bütün insaniyetniñ selâmetligi içün dua etmelimiz. Ramazan ayında bütün musulmanlarnıñ Allahu Taalânıñ merhametine, bağışlavına nail olmalarını içün niyaz etem.
Rabbimiz oraza ayından soñ Oraza bayramını birlikte qarşılap bayramlaşmaqnı qısmet etsin! Rabbimiz orazamıznı, dualarımıznı ve eyi amellerimizni qabul etsin!”
Qırım MDİ matbuat hızmeti