Qırım Cumhuriyeti ve Sevastopol şeeri musulmanları diniy idaresi Aqmescit şeer memuriyetiniñ başlığı Yelena Protsenkoğa “Merhametlik lâlesi” aktsiyasına destek köstergeni içün teşekkür bildirdi.
“2020 senesiniñ dekabr 10-26 künleri olıp keçken “Merhametlik lâlesi” aktsiyasını teşkil etmege yardım etkeniñiz içün minnetdarlığımıznı bildiremiz. Toplanğan paralarnıñ episi er kün ömüri içün küreşken ve, eñ müimi, sağlam olmağa arzu etken balalarnıñ tedaviylenüvine berilecek. Bizim leyhamız içün destegiñiz pek müim. Tek, siz kibi, lâqayd qalmağan insanlarnen birlikte biz balalarğa yaşamaq, ösmek ve inkişaf etmek şansını bere bilemiz. Ağır hasta olğanlarnıñ ömürine lâqayd qalmağanıñız içün sağ oluñız”, – dep, memuriyet başlığına muracaat ettiler aktsiya teşkilâtçıları.
Yelena Protsenko de, öz nevbetinde, faallerge samimiy teşekkürini bildirdi.
“Memuriyetniñ yardımı kerek olsa, daima bizge muracaat ete bilesiñiz, biz sizge mıtlaqa destek kösterermiz ve iştirak etermiz”, – qayd etti Aqmescit şeer memuriyetiniñ başlığı.
İhtar: “Balalarnıñ ellerinen ve büyüklerniñ eyi niyetinen yapılğan merhametlik” şiarı astında ötkerilgen “Merhametlik lâlesi” aktsiyası 2020 senesi dekabr 10-26 künleri keçirildi. Tedbirde iştirak etmek içün Aqmescit şeer mektepleriniñ talebeleri davet etildi, olar aktsiyanıñ timsali olğan lâleni öz ellerinen yaptılar, bundan soñ el işi lâleler satışqa çıqarıldı. Umumen, bir yarım biñ lâle yapıldı. Lâleler Aqmescitniñ memuriy müessiselerinde, afta soñraları da “Aşan”, “Tsentrum” kibi ticariy merkezlerde satıldı.
Qırım MDİ matbuat hızmeti
