Qırım Cumhuriyeti ve Sevastopol şeeri musulmanları diniy idaresiniñ hadimleri Aqmescit rayon memuriyetiniñ başlığı Dionis Aleksanovğa “Merhametlik lâlesi” aktsiyasınıñ keçirilüvine destegi köstergeni içün teşekkür bildirdiler.
Körüşüv çerçivesinde “Merhametlik lâlesi” aktsiyasınıñ rayon memuriyetinde keçirilmesine yekün çekildi. Aktsiya 2020 senesi, dekabr 16-sında keçirilip, onlarnen lâqayd qalmağan insannı birleştirdi. İstegenler aktsiyanıñ timsali olğan lâlelerni satın ala bildiler. Lâleler Aqmescit orta tahsil mektepleriniñ talebeleri tarafından yapılğan edi. Toplanğan paralar ağır hastalıqqa oğrağan balalarnıñ tedaviylenüvine berilecek.
QMDİ hadimleriniñ sözlerine köre, aktsiya cemaatçılıq arasında rezonansqa sebep olıp, hasta balalarnıñ qorantalarına diqqat çekti. Leyhanıñ kuratorları hayriye aktsiyasında iştirak etken memuriyetniñ bütün hadimlerine ve rayon sakinlerine teşekkür bildirdiler.
– “Öz nevbetimde aktsiya teşkilâtçılarına cemiyet içün müim ve kerekli yapqan işleri içün teşekkür bildirem. Eminim, rayonımız ileride de bunıñ kibi tedbirlerde iştirak etecek”, – dedi Dionis Aleksanov.
Qırım MDİ matbuat hızmeti ile İnformatsiya tehnologiyaları ve KMV ile alâqa bölügi
