QMDİ tış alâqalar ve hacılıqnı teşkil etüv bölüginiñ rehberi Artur Reşitov 2023 senesi Qırım musulmanları içün hacılıqnıñ teşkil etilüvine bağışlanğan muşaverede iştirak etti. Muşavere Qırım Cumhuriyetiniñ milletlerara munasebetler boyunca devlet komitetinde olıp keçti.
Muşavere iştirakçileri hariciy pasportlarnı aluv, hacılarnıñ aşılavı ve yolculıqnen alâqalı meselelerni muzakere ettiler. Qayd etilgenine köre, mesülietli nazirlikler ve idareler Qırımdan hacılıqqa baracaqlarnı yolculıqqa azırlamaq içün destek kösterecekler.
Qayd etmeli ki, bu yıl, 2023 senesi hacılıq mevsimi içün Rusiyege 25 000 kişilik kvota ayırıldı, olardan 600 yer Qırım musulmanlarına berildi. Bundan da ğayrı, hacılıqqa barmağa istegenlerniñ diqqatına aşağıdaki malümatnı yetkizemiz: AVN TUR 5 yıllıq, biometrik malümatları olmağan, eski şekilli, hariciy pasportları ile insanlardan arizalarnı qabul etmege başlay, olar daa qısqa müddet içinde yapıla. Onıñ içün 10 yıllıq pasportlarnı yapmağa yetiştirmegenler, kvotalarnı almaq içün 5 yıllıq pasportlarnı teslim ete bile.
Hacılıqqa barmağa istegenler tafsilâtlı malümat içün nevbetteki telefonlar boyunca muracaat ete bileler: +7 925 715 84 85; +7 978 09 08 202; 8 800 551 31 30.
Hatırlatamız, Qırım musulmanları diniy idaresiniñ resmiy hacılıq agenti “AVN TUR” şirketidir.
Qırım MDİ matbuat hızmeti