Qırım Müftiligi iş adamları ve göñüllilerniñ destegi ile Aqmescitteki №1 taqiqat izolâtorında (SİZO) bulunğanlar ve İK №1 taqiqattan keçkenler içün ananeviy hayriye aktsiyasını keçirdi.
Aqmescitniñ baş imamı, Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı Muhammed İslamovnıñ sözlerine köre, aktsiya çerçivesinde musulmanlar içün aziz Oraza bayramına bağışlanıp, maküm etilgenler ve taqiqattan keçeyatqanlar içün pilâv pişirildi.
“№1 SİZO-da 2 biñ insan içün pilâv pişirildi, tüzeltüv koloniyasında ise – biñ insan içün. Dini ve milletine baqmadan, er kes bayram müitini is etti”, – dep, qayd etti Muhammed İslamov.
Bundan da ğayrı, Aqmescitniñ baş imamı bildirgenine köre, koronavirus sebebinden kirsetilgen etraf müitten ayırıluv rejimine baqmadan, taqiqattan keçkenler ve maküm etilgenlerge aşayt mahsulatları, tatlılar, suv, sebzeler, meyvalar da yiberildi.
“Qırım Müftisi, cumhuriyetimizniñ musulman diniy idaresi adından taqiqat izolâtorı ve tüzeltüv koloniyasında bulunğan musulmanlarnı hayırlap, olarğa sağlıq, qaviy iman, sabır ve evlerine tezce qaytıp, qorantalarınen qavuşmalarını tiledik. Ümüt etemiz ki, evge qaytqan soñ, olar hidayet yoluna turar ve bir belâğa tüşmezler”, – dedi Muhammed İslamov.
Buña ilâve olaraq, o, Qırım Müftisi adından hayriye aktsiyasını teşkil etmege yardım etken iş adamları ve göñüllilerge teşekkürler bildirdi. Mayısnıñ 28-inde aynı taqım Keriçteki №2 tüzeltüv koloniyasına aşayt mahsulatlarını teslim etmek içün yolğa çıqacaq. Anda da biñ insanlıq pilâv pişirilecek.
QMDİ matbuat hızmet
