Aqmescitteki Kebir Caminiñ imamı İsmail Ablayev gençler arasında teşkil etilgen “Muabbetlikte birlik: dinlerara qonuşuvnıñ manialarını aşmaq içün yaşlıq cemiyetiniñ birleşmesi” serlevhalı tögerek masada iştirak etti. Tedbir Qırımnıñ ukrain cemiyeti tarafından Milliy birlik kününe bağışlanıp teşkil etildi.
Tögerek masa İ. Ya. Franko adına Qırım Cumhuriyeti universal ilmiy kitaphanesinde keçirildi. Tedbirde Qırım Cumhuriyetiniñ Gençler siyaseti boyunca devlet komitetiniñ reisi Aleksey Zinçenko, protoiyerey, yeparhiya missionerlik bölüginiñ yolbaşçısı Maksim Kondakov, “Siyasiy maarif merkezi” teşkilâtınıñ reisi, siyasetşınas İvan Mezüho ve “Qırım rus cemiyeti” teşkilâtınıñ reis muavini Natalya Lantuh da iştirak ettiler.
Tögerek masanıñ oturışına Fevzi Yaqubov adında Qırım müendislik pedagogika universitetiniñ, Qırım medeniyet, sanat ve turizm universitetiniñ, RF Prokuroraturası universiteti Qırım adliye institutınıñ, V. İ. Vernadskiy adına Qırım Federal universitetiniñ talebeleri ve “Yek Rusiyeniñ yaş gvardiyası” teşkilâtınıñ vekilleri qoşuldı.
Qırım MDİ matbuat hızmeti