Aqmescitniñ baş imamı, Qırım Cumhuriyeti ve Sevastopol şeeri Müftisiniñ yardımcısı Muhammed İslamov Rusiyeniñ Qırım Cumhuriyeti ve Sevastopol şeeri boyunca ÜFSİN-niñ cinaiy icra inspektsiyası tarafından teşkil etilgen “Ana-babalar kününde” iştirak etti. Tedbir Aqmescitniñ Merkeziy ve Kiyev rayonlarındaki ÜFSİN filiallarınıñ cedvelinde bulunğan pişkinlik çağına yetmegen balalar içün teşkil etilip, Aqmescitteki İ.Ya. Franko adına kitaphanesinde olıp keçti.
Körüşüv devamında pişkinlik yaşına yetmegen mahkümlerniñ içtimaiy adaptatsiyası, cemiyetniñ şahısqa tesiri, narkotik ve psihotrop maddelerniñ ve alkogolniñ menfiy tesiri, sağlam ayat tarzı ve qanunlarğa riayet etip yaşamaq kibi mevzular boyunca suhbet ve muzakere etildi.
Diñleyiciler ögünde İçki işler nazirliginiñ Qırım Cumhuriyetinde bölge politsiya mesulleriniñ ve bölükleriniñ pişkinlik çağına kirmegenler boyunca işniñ teşkil etilüvi bölüginiñ rehberi Ölga Alekseyeva, bağımsız menfaat kütmegen “Nezavisimost” teşkilâtınıñ müdiri Arsen İsmailov, Aqmescit rayonı boyunca qoranta, balalar ve gençlik içün İçtimaiy hızmet merkeziniñ mütehassısı İlya Donçenko çıqışta bulundılar.
Pişkinlik çağına yetmegen mahkümler ve olarnıñ ana-babaları Rusiyeniñ Qırım Cumhuriyeti ve Sevastopol şeeri boyunca ÜFSİN cinaiy inspektsiyasınıñ ruhiyatçısı tarafından keçirilgen testlerde iştirak ettiler ve davet etilgen mütehassılarğa olarnı meraqlandırğan suallerni berdiler.
Tedbir sanitariya ve epidemiologiya qaidelerine riayet etilerek keçirildi.
Qırım MDİ matbuat hızmeti