Qırım Cumhuriyeti ve Sevastopol şeeriniñ Müftisi hacı Emirali Ablayev “Qalpte iman ile” kitabınıñ müellifleri Zenife Ablayeva ve Gülnara İlyasovanıñ teşebbüslerine qol tuttı. Müellifler sürgünlik şaatları hatıralarınıñ toplanuvı boyunca işini devam etecekler.
“Neşir Qırımda ve yarımada tışında çoq müsbet şekilde qarşılandı. 1944 senesi, mayıs 18 künü sürgünliginiñ şaatları bu dünyadan kete, bu qaçınılmazdır, ve biz tarihiy hatıralarınıñ saqlanuvınıñ müimligini yahşı añlaymız. Onıñ içün lâqayd qalmayıp, işine büyük meraqnen davranğan yaş ülkeşınaslarğa qol tutmağa azırmız”, – qayd etti Müfti efendi.
Qırım Cumhuriyeti ve Sevastopol şeeri musulmanları diniy idaresine (Tavriya Müftiyatına) cumhuriyetniñ sakinleri adından “Qalpte iman ile” kitabı içün, müellifleri Zenife Ablayeva ve Gülnara İlyasovağa minnetdarlıq bildirgen mektüpler kelmege devam ete.
“Böyle acayıp kitapnı derc etkeniñiz içün teşekkür bildiremiz, onı oqup, biz ecdatlarımıznıñ hatıralarına dala bilemiz. Qorantamız ve kitap qaramanlarından biri, altı balanıñ anası, 16 torunnıñ qartanası ve 11 torundan torunnıñ qartanası Suleymanova (Şabutova) Elvina Bekir qızınıñ adından teşekkür bildiremiz ve yapqan işleriñizde toqtalmamaq tileymiz”, – aytıla Suleymanovlar qorantası yollağan mektüpte.
Diger qaraman Ayşe Qurtveliyevanıñ balaları ve torunları qayd ettiler ki, “Qalpte iman ile” kibi kitaplar qırımtatar halqı içün pek müim, çünki olar olıp keçken vaqialar aqqında hatıranı saqlay. “Böyle neşirler sayesinde, biz, yaş nesil, vatandaşlarımıznıñ kerçek ayatı ile tanış ola bilemiz. Biz şu kitapnı saqlaycamız ve kelecek nesillerge yetkizecekmiz. Müelliflerge teşekkür bildiremiz”, – yazdılar Qurtveliyevler mektüplerinde.
“Semetdeşlerimizniñ aile albomlarında unikal fotoresimler saqlıdır, olar qırımtatar halqınıñ tarihını aks ete. “Qalpte iman ile” kitabı üzerinde çalışqanda, biz kendimiz içün pek meraqlı şeyler ögrendik. Qırım Müftisi hacı Emirali Ablayevniñ desteginen işbu malümatlarnı oquyıcılarğa yetkizip, olardan da cevaplar alğanımızğa çoq sevindik. Bu pek müimdir, çünki er bir kitapnıñ beli auditoriyası olmalı. İnsanlar neşir munasebetinen seslense, mektüpler yazsa, kelecek neşirlerde olarnıñ ayat ikâyesini yazmağa rica etse, demek, jurnalist maqsadına yetti ve oquyıcılarğa esas ğayeni yetkizip oldı”, – deyler kitap müellifleri Zenife Ablayeva ve Gülnara İlyasova.
Eger siz qorantañıznıñ sürgünlik ikâyesi aqqında tarif etip, “Qalpte iman ile” leyhasınıñ bir parçası olmağa isteseñiz, kitap müelliflerinen bağlanmaq içün nevbetteki elektron adresine yazıñız: dumk.otdelorg@yandex.ru
Qırım MDİ matbuat hızmeti
