Qırım Cumhuriyeti ve Sevastopol şeeri musulmanları diniy
idaresiniñ hadimleri – Qırım Müftisiniñ muavini Esadullah Bairov ve
Kezlev şeer bölgesiniñ baş imamı Eskender Memetov "Zemaneviy
geosiyasiy tehlikeler şaraitinde maneviy-ahlâqiy qıymetlerniñ
pekitilüvinde İslâmnıñ rolü" halqara ilmiy-ameliy konferentsiyasında
iştirak ettiler.
Konferentsiya Qaraçay-Çerkessiyanıñ Çerkessk şeerinde keçirilip,
Qaraçay-Çerkessiya İslâm institutınıñ 30 yıllığına ve Şimaliy Qafqaz
musulmanları Koordinatsiya merkeziniñ 25 yıllığına bağışlandı.
Tedbirde diniy hadimler, diniy ve dünyaviy tahsil müessiseleriniñ
rehberleri, Qaraçay-Çerkessiya, Moskva, Adıgeya, Krasnodar ülkesi,
Çeçenistan, Dağıstan, Şimaliy Ösetiya, Kalmıkiya, Qırım, Başqortostan,
Stavropol ülkesi akimiyet organlarınıñ ve havfsızlıq idareleriniñ vekilleri,
çetelden kelgen diniy erbaplar – Suriye Arap Cumhuriyetinden,
Mısırdan, Qazahstandan, Qırğızstandan, Fransadan, İsviçreden,
İtaliyadan, Bulğaristandan, Belçikadan kelgen musafirler iştirak etti.
Konferentsiya neticesinde nevbetteki vesiqalar qabul etildi: Rusiye
Prezidenti V. V. Putinge muracaat, Rusiye Müftileriniñ dünya musulman
Ümmetine muracaatı, RF Prezidentiniñ 09.11.2022 tarihlı №809
Fermanına binayen, ananeviy diniy-ahlâqiy qıymetlerniñ saqlanuvı
boyunca devlet siyasetine uyğun tedbirlerniñ musulmanlarnıñ diniy
teşkilâtları tarafından ömürge keçirilmesi boyunca yol haritası.
Tedbirniñ teşkilâtçıları: Qaraçay-Çerkessiya Cumhuriyeti
musulmanlarınıñ diniy idaresi ve Ebu Hanife adına Qaraçay-Çerkessiya
İslâm institutı, İslâm medeniyeti, ilimi ve tahsiline destek fondu ve
Qaraçay-Çerkessiya Cumhuriyeti akimiyetiniñ yardımı ile.
Qırım MDİ matbuat hızmeti