Seyit Settar cami külliyesindeki oquv binasınıñ konferentsiya zalında er kişiler içün arap tili kursu başlandı. Birinci dersni Aqmescit rayonındaki Levadki köyüniñ imamı, filologiya ilimleri namzeti, Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatı) İslâm ilimleri ocası Rustem Memetov keçirdi.
Kurs 4 ay devam etecek, dersler aftada bir kere keçirilecek. Kurs 12 yaşını toldurıp keçken er kişiler içün qararlaştırılıp, başlanğıç, orta ve yüksek seviyelerinde arap tilini ögretecek. Kurs talebeleri grammatikanı ögrenecek, til baylığını arttıracaq, arap tilinde oquvnı ve şu tilden tercime etüvni menimseycek.
Til kursunıñ soñundaki testlerni muvafaqiyetli şekilde tapşırğan talebeler ekinci, yani orta derecege keçmek imkânını qazanacaq. Dersler “Medine kursu” programmasına esaslanaraq azırlandı. Kurs Quranda ve Sunnette qullanılğanı şekildeki İslâm terminologiyası ile zemaneviy arap leksikasını qavrap ala.
İhtar. Arap tili kursuna er istegen yazala bile. Dersler er salı künü saat 18.00, Seyit Settar cami külliyesindeki okuv binasınıñ konferentsiya zalında keçirilecek. Adres: Aqmescit şeeri, Klara Tsetkin soq., 34. Tafsilâtlı malümat içün telefon: +7978 074 18 47.
Qırım MDİ matbuat hızmeti