Qırım Cumhuriyeti ve Sevastopol şeeri musulmanları diniy idaresinde Müftilikniñ qadın ocalarınıñ er aylıq toplaşuvı olıp keçti. Toplaşuvnı Qırım musulmanları diniy idaresiniñ tedbirlerni teşkil etüv bölüginiñ rehberi, “Alem-i nisvan” islâmiy qadınlar medeniy-maarif merkeziniñ rehberi Zenife Ablayeva keçirdi.
Toplaşuv esnasında iştirakçiler bölgelerde olğan içtimaiy problemalar aqqında esabatlarını berdiler ve 2024 senesi Prezident tarafından Qoranta yılı olaraq ilân etilüvine binayen, devlet programması çerçivesinde çoqbalalı qorantalarğa destek kösterilüviniñ yollarını muzakere ettiler.
Bundan da ğayrı, Ramazan ayı yaqınlaşması munasebetinen çeşit alıp barılacaq leyhalarnen beraber “Merhametlik lâlesi” hayriye aktsiyasında em ocalarnıñ, em de talebelerniñ er seviyedeki iştirak etmeleri meselesi muzakere etildi.
Toplaşuv çerçivesinde ocalar Büyük Cuma camini ziyaret ettiler.
Qırım MDİ matbuat hızmeti