Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayevniñ rayon imamları ile iş körüşüvi olıp keçti.
Körüşüv devamında diniy erbaplar ay devamında yapqan işleri içün esabat berdiler, hususan, Qurban bayramına bağışlanğan tedbirler aqqında tarif ettiler, ve kelecek ayğa planlarınen paylaştılar. Buña ilâve olaraq, imamlar koronavirusnen hastalarnıñ sayısı ep artqanı munasebetinen qasevetlerinen paylaştılar.
Aqmescitniñ baş imamı Muhammed İslamov koronavirus hastalığı sebebinden vefat etken insanlarnıñ “Abdal” mezarlığında defin etilüv hususiyetlerini añlattı.
Qırım Müftisi hacı Emirali Ablayev imamlarnı yaşağan yerlerinde koronavirus infektsiyasınen bağlı añlatuv işlerini arttırmağa çağırdı.
“Bugünki künde hastalıqnen bağlı vaziyet alâ daa kergindir, insanlarğa kütleviy tedbirlerniñ tehlikeleri aqqında añlatıñız. Biz, körüşkende, quçaqlaşmağa ve qol tutuşmağa alıştıq. Amma şimdi böyle areketlerden vazgemek kerek olğanını añlatmalımız. Bugün bu havflıdır. İnşallah, bir kün pandemiya bitecek, şimdi ise, sabırlı olmalımız. Hususan, bu esli başlı insanlarnen bağlıdır. Bugün er birimizniñ ögünde aşılama meselesi turmaqta, er birimiz özümiz içün qarar almalımız”, – dedi Müfti efendi.
Al-ı azırda Qırım MDİ imamlarınıñ çoqusı aşılavdan keçti.
Buña ilâve olaraq, iş körüşüvi devamında rayon imamları muharrem, hicret ve Aşure künü aqqında maruzanı diñlediler, dersni Qırım Müftisiniñ muavini Raim Ğafarov añlattı.
Tedbirniñ soñunda Müfti efendi imamlarnı kene keçken Qurban bayramınen hayırladı, yapqan faaliyetleri içün teşekkürler bildirdi ve olarğa sağlıq ile yañı musulman yılında muvafaqiyetler tiledi.
Qırım MDİ matbuat hızmeti
