Qırım Cumhuriyeti ve Sevastopol şeeri musulmanları diniy idaresinde rayon imamlarınıñ ağımki aylıq toplaşuvı olıp keçti.
Toplaşuv devamında din erbapları iş meselelerini, muzakere ettiler, şu cümleden uquqiy meselelerge diqqat ayırıldı.
Hususan, imamlarğa diniy binalarnıñ havfsızlıq pasportlarınıñ resmiyleştirilüv tertibi añlatıldı. Hatırlatmalı ki, Rusiye Federatsiyası Akimiyetiniñ 2019 sene, sentâbr 5 tarihlı №1165 qararı mücibi bütün diniy teşkilâtlarğa ait obyektler ve topraqlarnıñ terroristlerden qorunmasını teminlemek içün teşkiliy, müendislik-tehnik ve diger tedbirlerniñ alınması kerek.
Bundan da ğayrı, toplaşuvda ayrı diqqat Müftiniñ koronavirus pandemiyasına qarşı tedbirlerniñ arttırılması aqqındaki emirine ayırıldı. Bu emirge esasen, mıtlaq sürette tibbiy maskalarnıñ taqılması, antiseptik, dezinfektsiya vastalarnıñ qullanılması, içtimaiy mesafeniñ qorçalanması, insanlar kütleviy şekilde toplanğan yerlerniñ ziyaretinden vazgeçilmesi kerek.
Din hadimlerine daa aktiv şekilde COVID-19 virus infektsiyasınıñ darqalmaması içün bütün şu havfsızlıq tedbirlerine riayet etilmesine çağırıp, ealige vaziyetni añlatmaq tevsiye etildi.
QMDİ matbuat hızmeti
