Qırımnı Qırım Cumhuriyeti ve Sevastopol şeeri musulmanları diniy idaresiniñ daveti ile İnguşetiya Cumhuriyetinden kelgen bir eyet ziyaret etti. Eyetniñ terkibine din ve cemaat erbapları bar edi. İnguşetiya Cumhuriyetinden kelgen musulmanlar yaşlarnı terbiyelev saasında Qırım musulmanları diniy idaresiniñ tecribesini ögrenmek maqsadınen keldiler.
Terkibine İslâm medeniyeti, ilimi ve tasiline destek fondunıñ reisi Magomed-Başir Albogaçiyev de kirgen eyetni Qırım Müftisi hacı Emirali Ablayev ve Rusiye Federatsiyası Devlet Dumasınıñ deputatı Ruslan Balbek qarşıladılar. Musafirlernen subetleşken Qırım Müftisi Qırım musulmanları diniy idaresiniñ faaliyeti, diniy tasil ve hayriye leyhaları, regionlarda din cemiyetleriniñ koordinatsiyası aqqında tarif etti.
İnguşetiya eyeti Qırım Müftisine musafirçenligi içün teşekkür bildirip, bahşış olaraq Quran-ı Kerim ediye etti. Qırım Müftisi, öz nevbetinde, Tış alâqalar, milliy siyaset, matbuat ve malümat naziri Ruslan Volkovğa ve İslâm medeniyeti, ilimi ve tasili fondunıñ hadimi Magomed-Başir Albogaçiyevge teşekkürnameler taqdim etti.
“Biz iç bir vaqıt bizge köstergen eyi munasbetiñizni unutmaycaqmız. Biz, balalarımız ve torunlarımız bunı hatırlaycaq”, – dedi Qırım Müftisi.
İslâm medeniyeti, ilimi ve tasili fondunıñ İnguşetiya Cumhuriyetindeki vekili Magomed-Başir Albogaçiyev ise, İnguşetiya musulmanları din qardaşları qırımtatarlarğa, olarnıñ birligi ve biri-birini desteklegenleri içün daima büyük ürmet ile yanaşqanını qayd etti.
“Allahqa şükürler olsun, sizde mında er şey yahşı. Din qardaşlarımız qırımtatarlar öz tarihiy toprağında yaşap, inkişaf etkeni ve yaş nesilge vatanperverlik duyğusını, yüksek maneviyatnı aşlağanı bizni pek quvandıra”, – ayttı Magomed-Başir Albogaçiyev.
İnguşetiya eyetiniñ Qırımda bulunuv programması ğayet keñiştir. Musafirler Bütünqırım milliy küreş yarışını, Cuma caminiñ qurulış meydanını, Seit Settar diniy külliyesini, Borçoqraq qasabasınıñ camisini, Hanlar sarayını ve Bağçasaraydaki Zıncırlı medresesini ziyaret etti. Eyetniñ ziyareti devam ete.
QMDİ matbuat hızmeti
