Musulmanlarnıñ eki büyük bayramından biri olğan Qurban bayramı künleri Qırım Cumhuriyeti ve Sevastopol şeerinde Müftiniñ ÜFSİN ile işbirlik boyunca yardımcısı, Aqmescit şeeriniñ baş imamı Muhammed İslamov yardımcısı İbraim Zinetdinov ile Aqmescitniñ tahqiqat izolâtorını ziyaret ettiler. Muhammed İslamov ve İbraim Zinetdinov Qırım Müftisi hacı Emirali Ablayev ve Qırım Cumhuriyeti ve Sevastopol şeeri diniy idaresi adından izolâtorda bulunğan mahkümler ve tahkiqattan keçkenlerni Qurban bayramınen hayırladılar. “Elbette, ananemizge köre, dindaşlarımız bayram müitini duymaları içün, olarğa yalıñız olmağanlarını is ettirmek içün biz olarğa tatlı aşlar berip yiberdik. Er bir insannıñ ayatında ağır vaziyetler ola, er birimiz adaşa bile, lâkin er birimizniñ tövbe etmek aqqımız bar. Biz balalarğa tezden azat olmalarını ve qorantalarına qaytmalarını tiledik”, – dedi Muhammed İslamov.
Bundan da ğayrı, Qırım Müftiyatınıñ vekilleri tahqiqat izolâtorınıñ yolbaşçılarınen körüştiler, ibadetlerniñ tekmil şekilde eda etilmesi içün şaraitniñ teşkil etilüvi boyunca aktual meseleler muzakere etildi.
Qırım MDİ matbuat hızmeti