Qırım Müftisi Büyük Cuma camide birinci namaznı keçirdi

Qırımnıñ Büyük Cuma camisinde birinci cemaat namazı keçirildi.
Namaznı Qırım Cumhuriyeti ve Sevastopol şeeri Müftisi hacı Emirali
Ablayev keçirdi. Namazda 500-den ziyade kişi iştirak etti, şu cümleden
din erbapları, bölgelerniñ baş imamları, yerli din cemiyetleriniñ vekilleri,
Qırım Müftiliginiñ hadimleri, baş qurucı şirketiniñ temsilcileri, qurucılar,
akimiyet vekilleri ve cemaat erbapları iştirak ettiler.
Qırım musulmanlarınıñ yolbaşçısı dindaşlarımızğa muracaat
eterek, işbu tarihiy vaqianıñ bütün Rusiye musulmanları içün müimligini
ayrıca qayd etti.
"Bugün Qırım ve bütün Rusiye musulmanları içün quvançlı bir
kün. Biz bu vaqianı 50 yıldan ziyade bekledik. Bizge şu aydın, büyük ve
dülber yerde, bizim yañı ve çoq beklenilgen Cuma camimizde
toplaşmaqnı ve birinci namaznı qılmaqnı qısmet etken Yüce
Rabbimizge şükürler olsun. Şu caminiñ er bir musulman içün barmağa
tırışqanı yer olması, Qırım ve dünya musulmanları, bütün insaniyet
içün yüzyıllar devamında hızmet merkezi olması içün Allahqa niyaz
etemiz. Cuma cami bizim içün birlikniñ ve nesiller arasındaki bağnıñ
timsalidir", – dep, qayd etti Qırım Müftisi.
Hacı Emirali Ablayev Qırım Cumhuriyeti ve Sevastopol şeeri
musulmanları diniy idaresi adından cami qurucılığına nezaret etip,
destek bergen Rusiye Federatsiyasınıñ Prezidenti Vladimir Putinge, ve,
bunen beraber, Qırım başlığı Sergey Aksönov ile yardımı tiygen er keske
teşekkürler bildirdi.
Namazdan soñ toplanğanlar Vatanımıznıñ eyiligi, barışıqlıq ve
Rusiyedeki bütün halqlarnıñ muabbetligi içün topluca dua ettiler.
Büyük Cuma caminiñ resmiy açıluv tarihı daa soñra bildirilecek.
Qırım MDİ matbuat hızmeti