Qırım Cumhuriyeti ve Sevastopol şeeri Müftisi hacı Emirali Ablayev Saq rayonı din cemiyetiniñ vekilleri ve rayonnıñ imamlarınen körüşti. Körüşüv şeerniñ merkeziy camisi olğan “Yañı camide” olıp keçti. Toplaşuvda Qırım Müftisiniñ muavinleri Esadullah Bairov ve Raim Ğafarov, Saq rayonınıñ baş imamı Mesfer Settarov, Saq rayonınıñ din cemiyetleriniñ reisi Seitasan Asanov, Kezlev bölgesiniñ baş imamı Eskender Memetov ve yerli “İnkişaf” cemaat teşkilâtınıñ azası Eskender Bilâlov iştirak ettiler.
Toplaşuv esnasında toplanğanlar din cemiyetiniñ faaliyetini, ağımdaki meselelerni ve kelecek içün planlarnı muzakere ettiler. Hususan, rayonda alıp barılğan maarif işlerine baqıldı. Qırım Müftisi imamlarğa muracaat etip, yaş nesilni medresege oquşqa celp etmege rica etti.
“Bizge özümizden yetişken kadrlar kerek, al-ı azırda cumhuriyette camiler qurula, imamlarğa muhtacmız, bizge diniy tahsil alğan yaşlar kerek. Bu – Qırımda çoqasırlıq tarihqa malik İslâm dinimizniñ temellerini, urf ve adetlerimizni saqlamaq içün çoq müim bir vazifemizdir”, – dep, qayd etti Müfti efendi.
Bundan da ğayrı, o, imamlarnıñ, din cemiyetleriniñ reisleri ve azalarınıñ, din erbaplarınıñ, cenazeni keçirmek içün hızmet etken dindaşlarımıznıñ rolü büyük emiyetke saip olğanını qayd etti
“Bugün bir çoq vazifeler sizge tüşti. Cemiyetke hızmet budır. Rabbimiz bizge küçümizden ziyadesini buyurmaz, onıñ içün biz vazifemizni şerefnen becermelimiz”, – dedi Müfti efendi.
Müfti bey imamlarğa halqnıñ muracaatlarına diqqatnen davranmağa ve yardımcı olmalarını tevsiye etti.
Buña ilâve olaraq, Müfti rayon faalleriniñ suallerine cevap berdi, hususan, Saq rayonınıñ Aşağı Camin (Geroyskoye) köyünde caminiñ qurulması aqqında. Müfti Qırım MDİ qurucılıq ve topraq meseleleri boyunca bölükke caminiñ qurucılığı içün kerekli vesiqalarnı azırlamaqnı avale etti.
Muşavere esnasında Müfti efendi diniy cemiyetiniñ vekilleri ve rayonnıñ imamlarına Qırım Cumhuriyeti ve Sevastopol şeeri musulmanları diniy idaresi adından teşekkürnameler taqdim etti ve muşavere iştirakçilerine emekleri içün teşekkür bildirdi. Tedbirniñ soñunda Müfti cemaat namazını keçirdi.
Qırım MDİ matbuat hızmeti
