Qırım müsulmanları Diniy idaresinde Qırım Müftisi hacı Emirali Ablayevniñ QMDİ ocalarınen körüşüvi keçirildi. Körüşüv çerçivesinde toplanğanları internet-resurslarınıñ qullanıluvı ile İslâm dersleri keçirilüviniñ inkişafı ve imkânları muzakere etildi. Al-azırda QMDİ yanında Qurannıñ on-layn dersleri leyhası başlandı. Yaqın zamanda on-layn din dersleriniñ keñleşüvi planlaştırıla.
Müfti teşebbüske qol tuttı ve QMDİ-niñ diniy tasil bölügine teşkiliy suallerni nezaret etmege avale etti.
Bundan da ğayrı, ocalar diniy tasil saasında bilingval oquvı mevzusını muzakere ettiler. Müfti: “Yaş nesilge din ana tilinde ögretilmek kerek, çünki milletniñ maneviy mirası aynı tilde saqlanıp qaldı”, dep qayd etti.
QMDİ “Faydalı ilim” Merkeziniñ usuliy bölügi, ocalar içün “İslâm huquqı” boyunca keçirilgen imtiannıñ neticelerini çıqardı. Ocalar imtianda yüksek seviyeni numayış ettiler.
QMDİ matbuat hızmeti
