Qırım Cumhuriyeti ve Sevastopol şeeri Müftisi hacı Emirali Ablayev Moskva şeeri civarında yerleşken “Crocus City Hall” eglence merkezinde yüz bergen facianıñ qurbanları ve zararlanğanlarnıñ qorantalarına taziye bildirdi ve zarar körgen er kes içün dua yapmağa çağırdı.
“Qırım ve Sevastopol musulmanları diniy idaresinden ve şahsen öz adımdan Moskva vilâyetindeki kontsert zalına kelgenlerge yapılğan dehşetli ve canavarca terroristik ücüm qurbanlarınıñ qorantaları ve yaqınlarına teren taziyemni bildirem. Biz caniy ve insaniyetke sığmağan şu ücümge oğrağanlar içün dua etemiz. Allahu Taalâdan zarar körgenlerge qurtulış ve sağlıq soraymız. Canlarını ğayıp etken insanlarnıñ yaqınları ve soylarınen acılarını paylaşamız. Yüce Allah bu facianı yaşap keçmek içün bizlerge küç ve sabır bersin. Böyle facialar iç bir vaqıt tekrarlanmaması içün dua etemiz”, – dedi Qırım Müftisi.
Mart 22 künü, aqşam, “Crocus City Hall” binasında adiy insanlarğa ateş açıldı, qurşun sıqıldı, kontsert zalı yaqılaraq, viran oldı.
Qırım MDİ matbuat hızmeti