Qırım Müftisi hacı Emirali Ablayev Qırım Cümhuriyeti qaraylar diniy idaresiniñ başı El David Moiseyeviçniñ vefat olğanı sebebinden teren taziyelerini bildirdi.
Yahşı adam, yaşağan toprağınıñ vetanperveri olaraq bilingen David Moiseyeviçniñ ölümi aqqında qara haber büyük accı ile qabul etildi.
“David Moiseyeviç El — Qırım Cümhuriyetinde nam qazanğan medeniyet erbabı, ömüriniñ büyük qısmını yaş nesilniñ eñ güzel maneviy ve ahlâqiy an-anelerge köre terbiyesine, tek qaraylarnıñ degil de, umumen, Qırımda yaşağan milletler medeniyetiniñ saqlanmasına bağışladı. Qırım Cümhuriyeti musulmanları Diniy idaresi ve bütün Qırım musulmanları adından David Moiseyeviçniñ qorantası ve yaqınlarına teren taziyelerimni bildirem, bu büyük acını atlatmaq içün, Allah sizge küç ve sabır bersin”.
Malümat: David Moiseyeviç El (22.12.1928 – 29.11.2018). Qaray cemaat ve din erbabı, Qırım Cümhuriyeti qaraylar Diniy idaresiniñ itibarlı reisi, Qırım Cumhuriyetiniñ “Dünya – Allahnıñ ediyesidir” dinlerara Şurasınıñ reislerinden biri, “Dünya. Barışıq. Birlik” Kezlev dinlerara Şurasınıñ itibarlı reisi, Duvan adına mukâfatnıñ eki defa laureatı, Ulu Vatan cenkiniñ iştirakçisi. Kezlev şeeriniñ itibarlı sakini.
QMDİ matbuat hızmeti