Qırım Müftisi hacı Emirali Ablayev Qazanda HI Bütünrusiye tatar din erbaplarınıñ forumında iştirak ete. “Milliy özgünlik ve din” forumında biñ eki yüz delegat, devletniñ farqlı köşelerinden kelgen din erbapları ve cemaat faaliyetçileri iştirak ete.
Qırım Müftisi forumnıñ açılış oturuşında selâmlav sözlerinen çıqışta bulundı. O, forum iştirakçilerine muvafaqiyetli ve semereli çalışmalar tiledi. Qırım musulmanlarınıñ diniy yetekçisi qayd etti ki, qırımtatarlar içün diniy ve milliy mensübiyet bir-birinden ayırılmaz şeylerdir.
“Dinimiz sayesinde biz bir gruppağa, sülâlege, milletke ve devletke mensübiyetimizni derk etemiz. Dinimiz milliy özgünlimizni çevrelegen ananelerimizni saqlap nesillerimizge yetkizmege yardım ete”, – dedi Müftisi efendi.
Bundan da ğayrı, o, Tatarstan Cumhuriyetiniñ Devlet Mesleatçısı Mintimer Şaymiyevge, Tatarstan Cumhuriyetiniñ prezidenti Rustam Minnihanovğa, Tatarstan Cumhuriyetiniñ Müftisi Kamil Samigullinge ve Bütündünya tatarlar kongressi Milliy Şurasınıñ başlığı Vasil Şayhraziyevge çoq milletli Tatarstanda milletlerara ve dinlerara añlayışnen dostane munasebetlerni saqlağanları içün teşekkürler bildirdi. Bundan da ğayrı, o, Qırım başlığı Sergey Aksönov şahsında Qırım Cumhuriyeti akimiyetiniñ işi sayesinde cumhuriyette milletlerara ve dinlerara çoqasırlıq dostane munasebetler saqlanğanını qayd etti.
Bu senedeki forumnıñ şiarı tatar şairi Gabdulla Tuqaynıñ şiirinden alınğan: “İ tugan tel! Sindә bulgan iң elek kıylgan dogam…”.
Bundan da ğayrı, forumnıñ programması boyunca Tatarstannıñ Spassk rayonınıñ Bolğar şeerinde er yıl keçirilgen ananeviy “İzge Bolgar jıyenı” tedbiri keçirilecek.
Hatırlatamız, 2021 senesi Tatarstanda tuvğan tiller ve milliy birlik yılı olaraq ilân etildi.
Tatar din erbaplarınıñ birinci forumı Qazanda 2010 senesi, sentâbrde keçirildi. O zaman forumda Rusiyeniñ 40 bölgesinden 700-den ziyade din hadimi iştirak etti.
Qırım MDİ matbuat hızmeti
