Qırım müsülmanları Diniy İdaresinde rayon imamlarınıñ iştiraginen toplaşuv keçirildi. Diniy erbaplar öz qasaba ve şeerlerinde qarşılaşqan meseleler, eali arasında ötkerilgen maarif işleri aqqında tarif ettiler ve kelecek ayğa planlar belgilediler. Qırım Müftisi hacı Emirali Ablayev imamlarğa yerli akimiyet organları ile işbirlik qurmağa tevsiye etti. Qayd etkeni kibi, bütün meselelerni Müftiyat ve yerli akimiyet ile çezmek kerek. Qırım Müftisi muavini Ayder İsmailov Aqmescitte Qalğa-Sultan sarayı yerleşken tarihiy mekândaki vaziyetni aydınlattı. Şu yerde Müftiyat ve şahsen Müfti efendiniñ küçü ve desteginen qanunsız qurucılıq toqtatıldı. QMDİ din cemiyetleri ile iş alıp barğan bölükniñ reberi Raim Gafarov yarımada müsülmanları arasında çeşit aqıntılarnıñ darqalması, menfiy tesiri aqqında lektsiya oqudı. Soñra, Müftiyatnıñ sertifikatsiya ve standartizatsiya bölüginiñ hadimi Ridvan Maksudov “elâl” işhaneniñ tesis etilüvi boyunca malümat berdi. İmamlar daa çoq problemler aqqında, hususan topraq ve milletlerara munasebetleri meseleleri aqqında ikâye ettiler. Toplaşuvnıñ soñunda, iştirakçilerge yerli eali arasında darqatmaq içün “Hidayet” gazetası berildi.
QMDİ MDT matbuat hızmeti
