Qırım Cumhuriyeti ve Sevastopol şeeri musulmanları diniy idaresinde Müfti hacı Emirali Ablayevniñ yarımadada çalışqan tibbiyet hadimleri ile körüşüvi olıp keçti. Qırım musulmanlarınıñ diniy yetekçisi tibbiyet hadimlerine fedakârane emekleri içün teşekkür bildirdi. “Siz insaniyetke hızmet etesiñiz. Siz er kün can qurtarasıñız, bu pek mesülietli iştir. Cemiyetimiz, Qırım oğurına yapqan şu emegiñiz içün çoq sağ oluñız”, – dedi Emirali Ablayev.
Tıbbiyet hadimleri adından sözge çıqqan N. A. Semaşko adına Cumhuriyet klinik hastahanesiniñ ekimi Edgar Arakelân Müfti efendige Tibbiyet hadimleri künü munasebetinen hayırlavı, köstegen diqqatı içün teşekkür bildirdi.
Körüşüvniñ soñunda Müftisi efendi sağlıq sistemasında çoq yıllıq semereli emegi, işine sadıqlığı, tibbiy yardımnıñ keyfiyeti artqanı içün ve Tibbiyet hadimleriniñ zenaat bayramı munasebeti ile N. A. Semaşko adına Cumhuriyet klinik hastahanesiniñ baş ekimi Valentina Fursova; N. A. Semaşko adına Cumhuriyet klinik hastahanesiniñ hirurg ekimi Alimcan Alimovğa; N. A. Semaşko adına Cumhuriyet klinik hastahanesiniñ urolog ekimi Edgar Arakelânğa; Sürgün etilgen halqlarnıñ tibbiy teşkerüvi boyunca Konsultativ-diagnostik merkeziniñ baş ekimi, Qırımda ve Ukrainada nam qazanğan ekim Liliya Mustafayevağa; № 7 Aqmescit şeer klinik hastahanesiniñ baş ekimi, Qırım Cumhuriyetinde nam qazanğan ekim Ridvan İslâmovğa; Cürçi rayonındaki merkeziy hastahanesi baş ekiminiñ iqtisadiy meseleler boyunca muavini Zarema Fazılovağa; Qırım cumhuriyet qazalar tibbiyeti ve acele tibbiy yardım merkezi kontrol hızmetiniñ rehberi Anna Sosnenkoğa; Klinik onkologiya ve gematologiya merkeziniñ ekimine; № 1 Aqmescit klinik lohsahanesiniñ rehberi Zera Mutalipovağa teşekkürnameler ve hatıralıq ediler taqdim etti.
Qırım MDİ matbuat hızmeti