Qırım Müftisi hacı Emirali Ablayev türk halqına, Türkiyeniñ Elâzığ vilâyetinde olıp keçken zelzeleniñ qurbanlarına teren taziye bildirdi.
Türkiyede yüz bergen zelzelenen bağlı facia sebebinden teren taziyelerimizni bildiremiz. Qırım musulmanları insanlarnıñ elâk ve ğayıp oluvları haberi sebebinden büyük keder içindeler. Vefat etkenler içün Allahtan rahmet tileymiz. Yaralılarğa Rabbimiz acil şifalar bersin. Ülkeniñ sakinlerine baş sağlığı, sabır ve küç tileymiz.
Daa evel qayd etilgenine köre, Türkiyeniñ şarqında yüz bergen küçlü zelzele neticesinde 22 insan vefat etti ve 1030 insan yaralandı. 6,8 ball küçündeki zelzeleniñ merkezi Elâzığ vilâyetiniñ Sivrice şeerine rastkeldi, facia cuma künü, saat 20.55 olıp keçti. Fevqulâde vaziyetler agentligi bergen malümatqa köre, tabiat faciası yerinde Türkiyeniñ 28 vilâyetinden kelgen 493 qurtarıcı taqımı çalışa. Mobil operatorları ise, Elâzığ ve Malatya vilâyetlerinde mobil ağınıñ bedava çalışacağını ilân ettiler.
QMDİ matbuat hızmeti