Aqmescitte Qırım Cumhuriyeti ve Sevastopol şeeri Müftisi hacı Emirali Ablayevniñ adından er yıl keçirilgen ananeviy iftar olıp keçti. İftarda Qırım bölgeleriniñ baş imamları, yerli din cemiyetleriniñ azaları, cemaat ve medeniyet erbapları, iş adamları ve ermeni, bulğar, yunan, tatar, azerbaycan milliy-medeniy teşkilâtlarınıñ vekilleri bulundı.
Qırım Müftisi iftarnıñ musafirlerini selâmladı:
“Mubarek Ramazan ayı soñuna kele. Bir ay devamında biz oraza tuttıq, ibadetlerimizni yaptıq. Allah bütün dualarımıznı qabul etsin. Ramazan ayı bitken soñ, ibadetlerimizni devam ettirmelimiz. Bölgelerinde iftarlarnı, teravih namazlarnı keçirgen imamlarımızğa teşekkür bildirmege isteyim, olar camige kelgen musulmanlarğa Ramazan ayınıñ müitini tolusınen is etmege imkân berdiler. Bazıda biz diniy hadimlerimizniñ işine lâyıq qıymet kesmeymiz, amma olar cemiyetimiz içün çoq iş yapa. Becergen işleri pek müim. Bugün iftarımızda Qırımda yaşağan farqlı dinlerniñ ve milletlerniñ vekilleri de buluna. Bizim birligimiz ve dostane munasebetlerimiz Qırımnıñ inkişafı içün bir esastır. Ramazan ayı devamında orazalarını tutmaq ve ibadetke berilmek içün aqaylarına güzel şaraitni azırlağan qadınlarımızğa ayrı teşekkürni bildirmege isteyim. Yüce Rabbimiz eyi işleriñizni qabul etsin ve cümlemizge Oraza bayramını qarşılamaqnı qısmet eylesin”, – dedi hacı Emirali Ablayev.
İftar aqşamı devamında “Qırım” qırımtatar folklor ansambli çeşit ilâhiylerni icra etti.
Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) böyle iftarnı bütünqırım seviyesinde 25-inci kere keçire.
Qırım MDİ matbuat hızmeti