Qırım Müftisiniñ muavini Esadullah Bairov şerefli musafirlerniñ eyyeti terkibinde Rusiye islâm institutını ziyaret etip, oquv yurtunıñ 20-yıllıq yubileyine bağışlanğan tantanalı tedbirlerde iştirak etti. Yubileyge bağışlanıp, Tatarstanda müsulman tasil yurtları ocalarınıñ VI Halqara eki künlük forumı açıldı. Onıñ programması Bulğar ve Kazan şeerinde olıp keçti.
Açıluv tedbirinden evel musafirler oquv auditoriyaları, kitaphane, arap hattatı ve şarq medeniyeti Merkezi, tatar islâm tasili tarih Müzeyinde taqdim etilgen ekspozitsiyanen tanış oldılar.
Bundan soñ keçirilgen umumiy toplaşuvda Esadullah Bairov Cümhuriyetniñ din erbapları ve institut reberlerini oquv yurtınıñ yubileyi ile hayırlap, oña tek güllemege ve inkişaf etmege tiledi.
Esadullah Bairov: “Rusiye islâm institutında Qırım studentleriniñ oquğanı bizim içün ğayet hoştır. Demek, Cümhuriyetniñ din saasında yüksek ihtisaslı mütehassısları olacaq, olar ise yarımada ve İslâm dininiñ inkişafı içün çalışacaqlar”, – dep qayd etti.
Yubiley tedbirleri çerçivesinde islâm tasili boyunca muşavere keçirildi, mında devletniñ baş musulman aliy oquv yurtlarınıñ reberleri iştirak etti. Tatarstan, Başqortostan, Dağıstan, Çeçenistan, İnguşetiya, Kabardino-Balkariya, Mordoviya, Qaraçay-Çerkess, Moskov ve Nijegorod vilâyeti, ve Rusiyeniñ diger regionlarında müsulman oquv yurtlarında tasil alğan studentler arasında arap tili ve İslâm ilimleri boyunca XI Bütün Rusiye Olimpiadası keçirildi. Bundan da ğayrı, müsulman milletleriniñ medeniyetleri ve aveskârlar kinosı boyunca X Studentler festivali olıp keçti. Onıñ teşkilâtçısı Rİİ ülkeşınaslıq fakülteti oldı. Yubileyge bağışlanıp Bulğar İslâm akademiyasında müsulman oquv yurtları ocalarınıñ Halqara forumı ötkerildi.
QMDİ matbuat hızmeti
