Qırım Cumuhuriyeti ve Sevastopol şeeri musulmanları diniy idaresiniñ hadimleri Aqmescit şeer memuriyetiniñ binasında iş körüşüvini keçirdiler.
Qırım Müftisiniñ muavini Muhammed İslamov ve QMDİ MDT uquqiy bölüginiñ rehberi İbraim Qaymaqan, Aqmescit şeer memuriyetiniñ muavini Vladimir Kim ve milletlerara munasebetler bölüginiñ rehberi İslâm Üseinov ile birlikte, Abdal mezarlığınıñ musulman bölüginde defin etilüviniñ tertibini ve meselelerini muzakere ettiler.
“Mezarlıqnıñ musulman qısımı içün mesülietli olıp, işdeşlerimiz ile defin etilüvnen bağlı bir sıra meselelerni muzakere ettik. Buña ilâve olaraq, körüşüvde birlikte çalışmaq ve mezarlıqnı abadanlaştırmaq qararını aldıq”, – dep, qayd etti Muhammed İslamov.
QMDİ matbuat hızmeti