Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) hadimleri Qırım Cumhuriyetiniñ Milletlerara munasebetler boyunca devlet komiteti ve İsmail Gasprinskiy adına Mediamerkezniñ teşkil etkenleri “EtnoSMİ” etnikara yaşlıq jurnalistikası forumında iştirak etti.
Qırım Müftisi hacı Emirali Ablayev adından selâmlav sözleri ile forum iştirakçileri ögünde QMDİ diniy tedbirlerni teşkil etüv bölüginiñ rehberi Zenife Ablayeva çıqışta bulundı.
“Jurnalistniñ esas vazifesi – kerçek malümatnı taqdim etmek. Şimdi İslâm jurnalistikası degen yañı yöneliş ğayet aktualdir. Men sadece diniy köntent aqqında aytmayım. İlk evelâ, İslâm jurnalistikası İslâm degenlerine esaslana. Bu qıymetler diger dinlerde de bar. Böyle diniy ükümlerden biri – yalan yasağıdır. İslâm jurnalistikası çerçivesinde taşığan mesülietlerini, sözniñ büyük küçüni tolusınen añlağan jurnalistler terbiyelene. Eminim ki, bu yöneliş çoqmilletli Qırımda da kerekli ve aktual olur”, – qayd etti Zenife Ablayeva.
“Qırımda etnikara barışıqlıqnıñ temeli olaraq diniy kütleviy matbuat vastaları” mevzusındaki maruzanen QMDİ neşriyat bölüginiñ muarriri ve Müftilikniñ matbuat kâtibi Elvina Memetova çıqışta bulundı.
“EtnoSMİ” etnikara yaşlıq forumı kütleviy matbuat vastaları saasında mütehassıslar birleşmesi, jurnalist ihtisasını saylağan farqlı din ve milletlerge mensüp istidatlı yaşlar içün faaliyet meydanıdır. Forumnıñ maqsadı – Qırım Cumhuriyetiniñ etnik kütleviy matbuat vastalarına faal yaşlarnı celp etmektir.
Qırım MDİ matbuat hızmeti