Qırım Cumhuriyeti ve Sevastopol şeeri musulmanları diniy idaresine Tatarstan Cumhuriyeti Baş naziriniñ muavini, Bütündünya tatarlar kongressiniñ başlığı Vasil Şayhraziyev dostane ziyareti ile teşrif buyurdı.
Ziyareti çerçivesinde taraflar Müftilik ve Kongressniñ faaliyetlerini, alıp barılğan leyhalarını ve işbirliklerini muzakere ettiler. Körüşüvde Qırım Cumhuriyetinde Tatarstan Cumhuriyetiniñ daimiy temsilcisi Ruslan Şayahmetov da iştirak etti. Musafirler Aqmescitteki Büyük Cuma camini ziyaret ettiler.
Qırım ve Sevastopol Müftisi musafirlerge ziyaretleri ve Qırım musulmanlarına köstergenleri ürmet içün teşekkür bildirdi.
“Qırım ve Tatarstan arasındaki bağ pek küçlü, onıñ pek eskilerge tayanğan tarihiy tamırları bar. Biz bu bağnı devam ettirmek ve halqlarımıznıñ milliy ve ananeviy qıymetlerini saqlaycaq leyhalarnı ömürge keçirmek kerekmiz”, – dep, qayd etti Qırım Müftisi.
Tatarstan Cumhuriyeti Baş naziriniñ muavini Vasil Şayhraziyev Qırım Müftisini Tatarstan Cumhuriyetini ziyaret etmege çağırdı, hususan, mayısta keçirilecek Bütünrusiye diniy hadimler forumı ile “İzge Bolgar җıyenı” bayramına davet etti.
Qırım MDİ matbuat hızmeti