Tünevin, avgust 8-de, Qırım musulmanları İslâm taqvimi boyunca Muharrem ayınıñ 10-uncı kününe tüşken Aşure kününi qayd ettiler. Halq arasında şu künge Aşır künü de aytalar. İslâm dinine esasen, şu künde kökler ve yer, melekler ve birinci insan – Adem (a.s.) yaratıldı. Musulmanlar Qıyamet kününiñ de Aşure kününde qopacağına inana.
Bir çoq musulman Aşure kününde oraza tuta. Bu ananeniñ pek eski tarihı bar. Rivayetke köre, Muhammed Peyğamber (s.a.s.) Medinege hicret etip, kelgen soñ, yerli yehudiylerniñ Musa peyğamberniñ ve İsrail oğullarınıñ Mısır Firavunınıñ ordusından qurtulğanlarını şükürnen añmaq içün oraza tutqanlarını ögrengen. Muhammed peyğamber (s.a.s.) musulmanlarnıñ Musa peyğamberge daa lâyıq olğanlarını aytıp, em özü şu künde oraza tutmağa başlağan, em de bunı sahabelerine buyurğan. Bundan da ğayrı, hadislerden biz bilemiz ki, Allahnıñ Resuli (s.a.s.) Medige köçmeden evel, daa Mekkede şu künde oraza tuta edi. Peyğamberimizniñ sunnetine köre, oraza eki kün tutulmaq kerek (Muharrem ayınıñ 9-ıncı ve 10-uncı künleri, ya da 10-uncı ve 11-inci künleri).
Ehl-i sunnet ve cemaat alimlerine köre, Aşure künündeki oraza sunnettir. Adet üzre iftar sofrasına mahsus aşure aşı (aşır aş) qoyula. Şu aşnı on çeşit şeyden, – nohut, boğday, baqla, quru meyva ve yemişler ve saire şeylerden pişireler. Tünevin de Qırım musulmanları oraza tuttılar, aqşam ise, sofralar donatıldı, balalar ise, tatlılıqlarnen sıylandı.
FOTORESİMLERDE: Aşure sofrası başında Aqmeçit rayonınıñ musulmanları.
Qırım MDİ matbuat hızmeti