Qırım Müftisi hacı Emirali Ablayev ve Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) Birleşken Arap Emirlikleriniñ prezidenti şeyh Halife bin Zaid Nehayannıñ vefatı munasebetinen onıñ yaqınlarına ve tuvğanlarına, bütün BAE halqına içten taziye bildire.
“Biz şeyh Halife bin Zaid Nehayannıñ qorantası ve Birleşken Arap Emirlikleriniñ bütün halqına teren taziyeler bildiremiz. Bu acığa dayanmaq içün Allah küç ve sabır bersin. Allah rahmet eylesin. Allah Taalâğa dua etip, ebediy ayatta onıñ derecesini arttırmasını tileymiz. Amin. Epimiz Allah içünmiz ve qaytuvımız Oñadır”, – dedi Qırım musulmanlarınıñ diniy yetekçisi hacı Emirali Ablayev.
İhtar:
Şeyh Halife bin Zaid Nehayan – Ebu Dabiy emiri (2004 senesi, noyabr 2-den – 2022 senesi, mayıs 13-ke qadar) ve 2004 senesiniñ noyabr 3-yünden – 2022 senesiniñ mayıs 13-ke qadar Birleşken Arap Emirlikleriniñ ekinci prezidentidir.
O, evelki Prezident, şeyh Zaid Nehayannıñ (1918—2004) üyken oğludır.
1967 senesiniñ fevral ayında Halife Ebu Dabiy emirliginiñ veliahtı tayin etildi. BAE Prezidenti olaraq tayin etilmeden evel şeyh Halife eñ büyük emirlik olğan Ebu Dabiyniñ emiri edi, şu emirlikniñ saasında BAE-niñ 80 % neft yataqları yerleşe. Bundan da ğayrı, o, BAE-niñ neft boyunca aliy şurasınıñ reisi edi. Em de “Ebu Dabiy inkişafı fondunıñ” ve ADIA Ebu Dabiy suveren fondunıñ başlığı edi.
1971 senesi, BAE teşkil etilgen soñ, şeyh Halife Ebu Dabiyniñ baş naziri, mudafaa naziri ve maliye naziri oldı. 1973 senesi, dekabr 23 künü, o, Birleşken Arap Emirlikleriniñ baş naziriniñ ekinci muavini, 1974 senesi, yanvar 20 künü ise, Ebu Dabiy İcra Şurasınıñ reisi oldı.
1976 senesiniñ mayıs ayında, o, BAE Silâhlı quvetleri qomandanınıñ muavini oldı. 1980 senesinden başlap, Neft sanayısı aliy şurasınıñ reisi oldı. Ekologik tedqiqatlarnıñ rehberi olıp, kiyik tabiat agentliginiñ inkişafına siltem berdi.
Şeyh Halife arbiyler arasında populâr edi. O, sabırlı insan, şiiriyetniñ mühlisi olaraq biline edi. Babası kibi, toğan avını ve balıq tutmaqnı seve edi. O, BAE içün ananeviy sport yarışlarına, hususan, at ve deve çapuvlarına merağınen biline edi.
Şeyh Halife 2022 senesi, mayıs 13 künü uzun hastalıqtan soñ dünyasını avuştı, vefat etken künü ülkede 40 künlük matem ilân etildi.
Qırım MDİ matbuat hızmeti