Aqmescitte “Seyit Settar” külliyesiniñ konferentsiya zalında 2023 senesi hacılıqqa baracaq musulmanlar içün seminar keçirildi.
Qırım Cumhuriyeti ve Sevastopol şeeri Müftisi adından iştirakçilerge Müfti muavini Raim Ğafarov muracaat etti.
“Peyğamber efendimiz (s.a.s.) böyle degen: “Hacılıqqa barıp, yaramay sözler aytmağan ve günah yapmağan kimse evine, sanki anasından doğğanı kibi, günahlardan temizlenip qaytacaq”. Mekke ve Medineniñ muqaddes topraqlarında öz halqıñız, Vatanıñız, Qırım içün dua etiñiz. Allah hacılığıñıznı qabul etsin!”, – dedi Raim Ğafarov.
Toplanğanlar ögünde QMDİ tış alâqalar ve hacılıqnı teşkil etüv bölüginiñ rehberi Artur Reşitov, Rusiye tüketicilik nezaretiniñ (Rospotrebnadzornıñ) temsilcisi Sergey Tsıganov, Rusiye Hariciy işler nazirliginiñ Aqmescit şeerindeki vekili vazifesini vaqıtınca becergen Artöm Berezovskiy, Qırım Cumhuriyeti Milletlerara munasebetler boyunca devlet komitetiniñ milletlerara munasebetler ve migrantlarnıñ içtimaiy-medeniy adaptatsiyası meselelerine baqqan idaresiniñ reisi Dlâver Osmanov, “N. A. Semaşko adına Cumhuriyet klinik hastahanesi” devlet bücet sağlıq müessisesiniñ ekim-hirurgı Eldar Seydametov iştirak ettiler.
Seminar çerçivesinde Müftiligimizniñ ocaları hacğa baracaqlarğa hacılıqnıñ etaplarını ve unsurlarını añlattılar. Musulmanlarğa ameliy tevsiyeler berildi, yolğa nasıl azırlanmaq ve millionlarnen insanlar bulunğan yerde nege muqayt olmaq kerekligi aqqında tarif etildi.
Qırım musulmanlarını hacılıqqa “AVN-tur” hacılıq operatorı azırlay. Hac operatorınıñ rehberi Artur Reşitov hacılıqqa ketecek musulmanlarğa kerekli bütün vesiqalarnıñ yanlarında olmaq kerekligini tenbiyeledi.
Hacılıq boyunca seminar er yıl müminlerge em İslâmnıñ beşinci şartını eda etmeknen alâqalı, em de hacılıq yolculığınıñ yaşayış ve memuriy-ameliy tarafı aqqında malümat bermek içün keçirile.
Qırım MDİ matbuat hızmeti