Qırım Cumhuriyeti ve Sevastopol şeeri Müftisi hacı Emirali Ablayev Qırım sakinlerini Ğalebe künü ile hayırladı.
“Ürmetli qırımlılar!
Qırım Cumhuriyeti ve Sevastopol şeeri musulmanları diniy idaresi adından ve şahsen özümden Sizni Ulu Ğalebeniñ 78-yıllığı ile hayırlayım!
Peyğamberimizniñ hadisinde böyle buyurıla: “Vatanğa sevgi imandandır”.
Biz şu Büyük Ğalebeni azırlağan, Vatanımıznı qoruğan, barışıqlıq ve bütün halqlarnıñ azatlığı içün can bergen insanlarğa minntedarmız.
Musulmanlar, hususan, qırımtatarlar Ğalebege büyük isse qoştılar. Qırımtatar qahramanlarnıñ adları altın ariflernen devletimizniñ tarihında yazıldı.
Ulu bayram yüregimizde farqlı duyğular uyandıra – quvanç ve keder, şefqat ve yüksek ğayelernen tolıp taşa. Biz ecdatlarımız şerefi ve cesaretinen qıymetleri misilsiz olğan sulhni ve azatlıqnı qorçalap saqlamalarını ep hatırımızda tutamız.
Rabbimiz epimizge bereket, qaviy sağlıq ve barışıqlıq nasip esin!”
Qırım MDİ matbuat hızmeti