Qırım müsulmanları kütleviy şekilde eñ büyük musulman bayramlarından biri olğan Oraza bayramını qayd ettiler. Tantanalı tedbirler Qırımnıñ farqlı köşelerinde olıp keçti. Hususan, büyük balalar içün bayram Bağçasaraydaki Orta camide ötkerildi. Teşkilâtçılar balalar ve ana-babalar içün meraqlı programma azırladılar: viktorinalar, kvestler, sport yarışları, küreş, armresling, attraktsionlar, batut ve hna qoyuv resimleri. Balalar bahşışlarnı aldılar.
Bağçasaray rayonınıñ imamı Ramazan Asanovnıñ sözlerine köre, eñ esası yaş nesilge maneviy qıymetlerni, milletniñ urf adetlerini ve İslâm dinine sevgi aşlamaqtır.
“Qırım Müftiligi, bizim din cemiyetimiz ve hayır-sadaqa bergenlerge teşkiliy meselelerde destek köstergenleri içün, büyük teşekkürler bildiremiz”, – dep ayttı Ramazan Asanov. Bayramda 150 insan iştirak etti. Adet üzre, musafirlerni tatlı bahşişlar ve ziyafetler beklegen edi.
Saq şeeri camisinde keçirilgen bayramğa da çoq insan qoşuldı. Teşkilâtçılar balalarğa bilgi viktorinasını azırladı. Onıñ şartlarına köre, balalar şiiriy şekilde diniy tapmacalarğa cevap tapqan edi. Animatorlarnen birlikte balalar qırımtatar tilinde yırlarnı ögrendiler, yırladılar, şiirler ayttılar. Musafirler içün bayram sofrası donatıldı. Saq şeeriniñ imamı Mesfer Settarov Qırım MDİ, yerli din cemiyeti ve şeer memuriyetine bayramnıñ teşkil etilmesinde salmaqlı isseleri içün teşekkürler bildirdi. Bayram tedbirleri İslâm-Terek, Seitler, Aqşeyh ve Aqmescit rayonlarında olıp keçti. Oraza bayramı – müsulman taqviminiñ baş bayramlarından biri olıp, muqaddes Ramazan ayınıñ yekünlengenini temsil ete. Bu sene bayram iyün 15 künü başlandı.
QMDİ matbuat hızmeti
