Qırımda Sovetler Birliginiñ eki defa qahramanı, Devlet mukâfatınıñ laureatı, Sovetler Birliginde nam qazanğan üçüci-sınavcı Amethan Sultannıñ doğğanından 100 yıl keçkenine bağışlanğan tantanalı tedbirler olıp keçti.
Bir sıra tedbirlerde Qırım Cumhuriyeti ve Sevastopol şeeri musulmanları diniy idaresiniñ temsilcileri iştirak etti.
Qırım Müftisiniñ muavini Esadullah Bairov üçüci-sınavcınıñ yubileyine bağışlanğan ilmiy-ameliy konferentsiyasında iştirak etti, konferentsiya F.Yakubov adına Qırım müendislik ve pedagogika universitetinde olıp keçti.
“Qırımtatarlar bütün sovet halqınen bir sırada tuvğan topraqlarını faşist basqıncılardan qorçalay ediler. Cebhe ve cebhe arqasında kösterilgen qahramanlıq misalleriniñ sayısı-esabı yoqtır. Bugün biz dünyada barışıqlıqnıñ saqlanuvı içün canlarını feda etken insanlarnıñ hatırası ögünde başımıznı egemiz. Amethan Sultan – qırımtatar halqınıñ ğururıdır. Allah ondan razı olsun”, – ayttı Esadullah Bairov.
Qırım Müftisiniñ muavini Raim Ğafarov F.Yakubov adına Qırım müendislik ve pedagogika universitetiniñ saasında yerleşip, ulu uçucı Amethan Sultanğa bağışlanğan Hatıra alleyasında terekler saçıluvı merasiminde iştirak etti. Aktsiyada Qırım parlamentiniñ vitse-spikeri Vladimir Bobkov, Milletlerara munasebetler boyunca devlet komitetiniñ rehberi Albert Kangiyev, Rusiye Devlet Dumasınıñ Qırımdan millet vekili Ruslan Balbek iştirak ettiler.
Alupka müzeyinde yañartılğan “Amethan Sultan. Yıldızlarğa yol” serlevhalı ekspozitsiyasınıñ açılış merasiminde efsaneviy uçucınıñ hatırasına bağışlanğan duanı bölgeniñ baş imamı Osman Topuz oqudı. Mında spetsştempel ile qahramannıñ 100-yıllığına bağışlanğan bediiy zarflarnıñ müürlenmesi tedbiri olıp keçti.
Oktâbrniñ 25-nde Aqmescitniñ Amethan Sultan adına meydanında efsaneviy uçucığa bağışlanğan abideniñ tantanalı açıluv merasimi olıp keçti. Abideni Qırım Cumhuriyetiniñ başlığı Sergey Aksönov açtı. Merasimde veteranlar teşkilâtlarınıñ azaları, Cumhuriyet başlığı yanındaki Qırımtatar halqı şurasınıñ azaları, milliy areket veteranları, ürmetli musafirler ve paytahtnıñ sakinleri iştirak ettiler.
İHTAR: Amethan Sultan (1920-1971) – Sovetler Birliginiñ eki defa qahramanı, uçucı-as, Ulu Vatan cenkiniñ iştirakçisidir. Qırım ve qırımtatar halqınıñ qahramanı. O, Alupka şeerinde dünyağa keldi. 1945 senesi, iyün 30 künü o, muvafaqiyetnen 603 arbiy uçuşnı yapqanı, şahsen özü duşmannıñ 30 farqlı uçağını tüşürgeni ve taqım uruşlarında 19 duşman uçağını yoq etkeni munasebetinen Sovetler Birliginiñ eki defa qahramanı unvanına nail oldı. 1947-1971 ss. devamında – uçucı-sınavcı, Sovetler Birliginde nam qazanğan uçucı-sınavcı, Sovetler Birliginiñ Devlet mukâfatınıñ laureatıdır. O, 50 ziyade uçuş apparatını sınağan yekâne sovet uçucısıdır. O, avada 107 tehnika nümünesini sınap baqtı. 1971 senesi, fevral 1 künü Tu-16LL uçuş laboratoriyasında, yañı küçlü köçüriciniñ sınavı vaqıtında, ekipajınen birlikte ayatını ğayıp etti.
QMDİ matbuat hızmeti
