Qırımnıñ Büyük Cuma camisinde mütehassıslar qubbelerniñ bezetilip yaraştırıluvı işlerini başladı. Unikal örnekler üzerinde Türkiye Cumhuriyetinden kelgen mütehassıslar çalışa.
“Büyük Cuma cami quruluvınıñ eñ güzel ve çoq beklenilgen deviri başlandı – örneklernen bezetilmesi. Bu iş üzerinde “SGM-Grupp” qurucı teşkilâtı tarafından Türkiyeden davet etilgen 10 usta örnekçi çalışa. Mütehassıslar bildirgenine köre, divarlarnıñ örneklernen bezetilmesi içün tabiiy malzemelerden azırlanğan boyalar qullanıla. Böyle boyalar renkini uzun yıllar devamında saqlap qalmaqta. Qubbelerniñ bezetilmesi cami müendislik infrastrukturasınıñ yapılmasınen parallel şekilde alınıp barılacaq. Bunıñ içün qubbeler altındaki saa esas cami saasından mahsus şekilde ayırıldı, buña köre diger işlerniñ bitirilmesini beklemek de kerekmey”, – dedi “SpetsStroyKrım” baş qurucılıq teşkilâtınıñ rehberi Yevgeniy Zuyev.
Büyük Cuma camini bezetüv kontseptsiyasına qırımtatar medeniyetine ve ananesine ait örnekler kirsetildi. Mütehassıslarnıñ sözlerine köre, bu örnekler unikal olıp, Qırım tasvirini temsil etecek. Belli olğanı kibi, islâmiy örneklendirmede insanlarnıñ ve ayvanlarnıñ sıfatları qullanılmay, onıñ içün bütün simvolizm örnekler ile ifade etile. Qırım Cumhuriyeti ve Sevastopol şeeri musulmanları diniy idaresinde şu unikal Qırım eskiziniñ azırlanmasında nasıl ananelerge esasalanılğanını añlattılar.
“Büyük Cuma cami 19 metr diametrli büyük qubbeden, onı tutqan divarlardan ve sekiz daa kiçik yarımqubbeden ibaret. Bütün qubbelerni ve divarlarnı yaraştırmaq içün qırımtatar örnekleri ile “Naqqaş” sisteması qullanılacaq. İşletilecek örneklerniñ dünyada analogı yoq, ve o, mahsus Qırımnıñ Cuma camisi içün işlep çıqarılğan. Onda tekrarlanmaz eski osmanlı ve qırımtatar örnekleri ve rumi, islimi degen örneklerinden bazı unsurlar qullanılğan. Quran-ı Kerimden sure ve ayetlerden ibaret husnü hat levhaları olacaq. Temel olaraq mavı, qırmızı ve altın tüsler alınğan. Qubbelerde ve çatılarda Allahnı temsil etken sarı lâleler tasvir etilecek. Çatılar üstünden unikal “muqarnaslar” yerleştirilecek. Balqurt peteklerine oşağan bu çatı unsurları eskiden berli islâmiy mimarisinde qullanıla. Olar ancaq dülberlik içün degil, aynı vaqıtta seda funktsiyasını yerine ketireler”, – dep, añlattılar Müftilikte.
“SpetsStroyKrım” baş qurucı teşkilâtnıñ malümatına esasen, örneklendirme işlerini yapmaq içün kerekli bütün malzemeler artıq alınıp ketirildi. İşlerni dört ay içinde yapıp tamamlamaq planlaştırıla.
Büyük Cuma cami qurucılığınıñ investorı – “İçtimaiy-medeniy leyhalarğa destek fondu” kâr maqsatlı olmağan teşkilâtı, sımarıcısı – Qırım Cumhuriyeti ve Sevastopol şeeri musulmanları diniy idaresi merkezleştirilgen diniy teşkilâttır.
Qırım MDİ matbuat hızmeti