Aqmescitte İmam-ı Azam Ebu Hanife camisinde “Ezan sedası” adlı bütünqırım müezzinler yarışınıñ finalı olıp keçti. Umumen, Qırımnıñ çeşit bölgelerinde olıp keçken saylav turlarında 120 insan iştirak etti, finalğa ise, 20 iştirakçi keçti. Finalistlerge mütehassıs jüri eyyeti qıymet kesti. Jüri eyyetine Qırım Müftisiniñ muavini Raim Ğafarov, Aqmescitniñ şeeriniñ baş imamı Muhammed İslamov, ilâhiyatçı Remzi Qurtdede, Qalay islâmiy ilimler medresesiniñ müdiri Edem Lümanov, Aqmescit rayonınıñ baş imamı Enver Baqiyev, İmam-ı Azam Ebu Hanife adına caminiñ imamı Bekir Adilov kirdiler.
Ezanlarnıñ icrasına bir qaç kriteriy boyunca qıymet kesildi: doğru telâffuz, maqam, sesniñ gürligi, ifadeli oquv ve özüni sanada güzel tutuvdır.
Tedbirniñ soñunda yarış ğalipleri taqdirlendi.
Kiçik yaş taqımında:
I yer – Halilov Eşref-kence (İslâm-Terek rayonı);
II yer – İslâm İzeyev (Cürçi rayonı);
III yer – Bekir Qadiraliyev (Aqmescit şeeri).
Orta yaş kategoriyasında:
I yer – İmran Ümerov (Aqmescit şeeri);
II yer – İsmail Suleymanov (Qurman rayonı);
III yer – Rasul Abdullayev (Canköy şeeri).
Büyük yaş kategoriyasında:
I yer – Server Şabanov (Aqmescit şeeri);
II yer – Aziz Qarakaş (Bağçasaray şeeri);
III yer – Rustem Aripov (Canköy şeeri) ve Mustafa Mustafayev (Aqmescit şeeri).
Ğalipler ve iştirakçiler qıymetli bahşışlar ile taqdirlendi.
Eñ güzel müezzinlerni Qırım ve Sevastopol Müftisi hacı Emirali Ablayev hayırladı.
“Bizim arzumız ve maqsadımız – Qırımda daima ezan sesi yañğırasın. Ve biz ezannı oqumağa tırışqan insanlarğa destek köstermek kerekmiz”, – dedi Müfti efendi.
Qırım Cumhuriyeti ve Sevastopol şeeri musulmanları diniy idaresi Boğurça qasabasınıñ din cemiyeti ile birlikte iştirakçiler, tedbir musafirleri ve balalar içün meraqlı programmanı ve ziyafetni azırladılar.
Qırım MDİ matbuat hızmeti
