Aqmescitniñ baş imamı Muhammed İslamov ve Qırım Cumhuriyeti ve Sevastopol şeeriniñ CİFH-niñ terbiye işleri başınıñ muavini, pravoslav din erbabı mahküm etilgenler içün intihar günahı aqqında videoleyhanı azırladılar.
Videoleyhalar Aqmescitniñ №1 koloniyası ve Keriç şeeriniñ №2 koloniyasında, Aqmescit şeeriniñ tahqiqat izolâtorında, ve Qırım Cumhuriyetiniñ diger rejimli müessiselerinde bulunğan mahkümlarğa köstermek içün yollanılacaq. Lektsiyalarnıñ mevzusı: “İslâmnıñ intihar günahına baqışı”.
Muhammed İslamovnıñ sözlerine köre, Qırım Cumhuriyeti ve Sevastopol şeeri musulmanları diniy idaresiniñ ve QC ve Sevastopol ş. CİFH işbirliginde esas diqqat apis yerlerinde intiharlarnıñ qarşısını almağa ayırıla.
“Biz lektsiyalar oquymız, şahsiy suhbetler keçirip, mahkümlerge İslâmnıñ büyük günah olğan intiharğa baqışını açıqlaymız. Videoleyhalar ise, kerekli malümat kölemini konkret ve doğru şekilde, eñ esası da – qısqa ve öz şekilde bergen material olaraq saylandı”, – tarif etti Muhammed İslamov.
Bundan da ğayrı, onıñ qayd etkenine köre, İslâmda intihar sıradan bir günah degil. Bu – tövbesi mümkün olmağan yekâne bir günahtır.
“Ey, iman etkenler! Yardım içün sabır ve namazğa muracaat etiñ. Şübesiz, Allah sabır etkenlernen beraberdir” (Quran, “Baqara” suresi, 2/153 ayet).
Qırım MDİ matbuat hızmeti