Qırım Müftiliginde Qırım Cumhuriyeti ve Sevastopol şeeri musulmanları diniy idaresi şurasınıñ nevbetteki toplaşuvı olıp keçti. Tedbir çerçivesinde bir sıra meseleler baqıldı, şu cümleden mubarek Ramazan ayı devamında camilerniñ işleyişi muzakere etildi.
Muzakereler neticesinde QMDİ şurası keñeşip, rey çoqluğınen eki qararnı aldı:
– teravih namazı 20 rekât olaraq, sanitar ve epidemiologik tedbirlerge riayet etilerek qılanacaq; camilerde maskalarnıñ taqılmasına ve ara mesafeniñ tutulmasına diqqat etilecek.
– hastalıqnıñ kene ket-kete daa tez darqalıp başlamasını köz ögüne alıp, camilerniñ içinde ve azbarında iftarlarnıñ keçirilüvi sıñırlanacaq.
Qırım Müftisi hacı Emirali Ablayev musulmanlarğa muracaat etip, COVID-19 koronavirus hastalığınıñ yañı darqaluv dalğasınıñ havfı sebebinden tedbirlerge uymalarını ve şu qararnı añlayışnen qarşılamalarını rica etti.
Qırım MDİ matbuat hızmeti
