Qırım ve Sevastopol Müftisiniñ muavini Raim Ğafarov Alime Abdennanova adına № 44 orta umumtahsil mektebinde oquv yılınıñ yekünlenüvine bağışlanğan tantanalı tedbirde iştirak etti. Talebeler ve mezunlarğa muracaatında Raim Ğafarov bilgi almaqnıñ müimligine urğu yaptı, mektepniñ ocalarına ise, emegi içün teşekkür bildirdi. “Dinimiz İslâm er yönden bilgi almağa teşviq ete. Muhammed Peyğamberimiz (s.a.s.): “Bilgi almaq içün yolğa çıqqan bir kimsege Allah cennet yolunı qolaylaştırır”, – degen. Ögreniñiz, bilgili oluñız, çünki aynı maarif milletniñ inkişafına siltem bere. Yeñişleriñizde toqtalmañız, yañı bilgi almağa tırışıñız”, – dedi Qırım musulmanları diniy yetekçisiniñ muavini.
Bu sene oquv yurtında 45 mezun bar, olardan biri altın medalni almaq içün namzettir.
Qırım MDİ matbuat hızmeti