Qırım Cumhuriyeti ve Sevastopol şeeri musulmanları Müftisiniñ muavini Raim Ğafarov Sovetler Birliginiñ eki defa qaramanı Amet-Han Sultannıñ doğuvına 102 yıl tolması munasebetinen keçirilgen merasimlerde iştirak etti. Aqmescitte efsaneviy uçucınıñ abidesine çiçekler qoyuldı.
Raim Ğafarov tedbirde dua oqudı ve iştirakçileriniñ ögünde sözge çıqıp, Amet-Han Sultannıñ halqnıñ hatırasında daima qalacağını qayd etti. “Bizni duşman elinden qurtarğan, Ulu Vatan cenkinde faşizm vebasınen küreşerek, canlarını feda etip, ğalebeni yaqınlaştırğan er bir askerimiz hatıramızda qalacaq”, – qayd etti Raim Ğafarov.
İhtar: Amet-Han Sultan (1920-1971) – Sovetler Birliginiñ eki defa qaramanı, as uçucı, Ulu Vatan cenkiniñ iştirakçisi. Qırımnıñ ve qırımtatar halqınıñ qaramanı. O, Alupkada doğıp büyüdi. Amet-Han Sultanğa 1945 senesi, iyün 30-da muvafaqiyetli keçirilgen 603 dane cenk uçuşı, şahsen 30, taqımı ile 19 mühtelif duşman uçağını urıp tüşürgeni içün Sovetler Birliginiñ eki defa qaramanı unvanı berildi. O, 1947-1971 seneleri uçucı-sınavcı hızmetinde bulundı, Sovetler Birliginde nam qazanğan uçucı-sınavcı, Sovetler Birligniniñ Devlet mukâfatınıñ laureatı, 50-den ziyade uçaq çeşitini sınağan yekâne sovet uçucısı oldı. O, avada 107 uçaqnı sınadı. Devirimizniñ acayip adamı, qırımtatar halqınıñ iftiharı Amet-Han Sultan 1971 senesi, fevral 1-de yañı Tu-16LL uçqan laboratoriyanıñ uçuv sınavı vaqıtında, yañı küçlü reaktiv dvigatelni sınayatqanda canını berdi.
Qırım MDİ matbuat hızmeti