İftar – Ramazannıñ ayırılmaz qısımıdır. Bütün dünyada musulmanlar Allahnıñ razılığını qazanmaq içün öz evlerinde iftar sofralarını quralar ve camilerde iftarlarnı teşkil eteler. Qırım camilerinde Ramazan ayınıñ birinci künlerinden başlap, toplu iftarlar keçirile.
İslâm Terek rayonındaki Caylav Saray (Zolotoye pole) köyüniñ camisinde yerli sakinler büyük quvanç ile iftarğa toplandılar. İmam İldar Mustafayevniñ qayd etkenine köre, iftar – köy sakinleri içün büyük vaqiadır. “Mında insanlar qonuşa, aqıl tanışa. İftar – musulmanlarnı birleştire”, – dedi İldar Mustafayev.
Aqmescit rayonındaki Hoşkeldi qasabasınıñ imamı Rustem Sakalı qayd etkeni kibi: “Ramazan – maneviy temizlenüv ve sabır zamanıdır. Bu ayda musulman davalardan uzaq tura ve, imkânğa köre, öz maneviyatı üzerinde çalışıp, Rabbinen ve etraftaki insanlarnen munasebetlerni eyileştirmege tırışa”.
Hatırlatamız, toplu iftarlar Qırımnıñ bütün camilerinde Ramazan ayınıñ soñuna qadar keçirilecek. Böylece, Aqmescitteki Kebir camisinde toplu iftarlar er kün keçirile.
Qırım MDİ matbuat hızmeti