Müftiyatımıznıñ vekili – QMDİ tış alâqalar bölüginiñ hadimi Seyar Ablâzizov Rusiye hac missiyasınıñ 20 yıllığına bağışlanğan “Rusiye musulmanlarınıñ hacılığı: imperiyadan federatsiyağa qadar” serlevhalı konferentsiyada iştirak etti. Tedbir mayıs 23 künü Moskva cuma camisinde olıp keçti.
Konferentsiyanıñ işinde RF Prezidenti Memuriyetiniñ, Federatsiya Şurasınıñ, cumhuriyetlerdeki diniy idarelerniñ vekilleri, hac operatorları ve digerler iştirak ettiler.
Spikerler qayd etkenine köre, Rusiyeniñ hac missiyası Rusiye musulmanlarınıñ Mekkege hacılıqqa baruvlarını teşkil etüv işinde diniy teşkilâtlarnıñ ve akimiyet strukturalarınıñ sistemli işbirligini başlattı.
Konferentsiya devamında hacılıqnı teşkil etüv saasında yañılıqlar ve Hac missiyasınıñ elektron platforması meydanğa ketirilüvi muzakere etildi. Mezkür elektron platforma, bir taraftan, Saudiye Arabistanı Memleketiniñ Hacılıq işleri boyunca nazirliginiñ standartlarına uyğun olmalı, diger taraftan, bütün malümatnı (reyslerniñ planlaştırılması, musafirhanelerniñ tutulması, maliy esaplar ve diger bir çoq şey) operativ şekilde ve onlayn rejimde toplap işlemege imkân bermeli.
Konferentsiyadaki müim vaqialardan biri Rusiye Hac missiyasınıñ yubileyine bağışlanıp, “ÇİTAY” yayın evi tarafından neşir etilgen “Musulmanlarnıñ hacılığı: Rusiye imperiyasından Rusiye Federatsiyasına qadar” kitabınıñ taqdimi oldı.
Konferentsiya devamında Qırım Cumhuriyeti ve Sevastopol şeeri musulmanları diniy idaresiniñ hacılıq operatorı – “AVN-tur” şirketiniñ rehberi Artur Reşitovğa teşekkürname taqdim etildi. Teşekkürname çoq yıllıq semereli işi, milletlerara ve dinlerara barışıqlıqnıñ saqlanuvına qoşqan salmaqlı issesi ve Rusiye musulmanlarınıñ muqaddes yerlerge barıp, hacılıq etmelerini teşkil etkeni içün berildi.
Qırım MDİ matbuat hızmeti