Mubarek Ramazan ayınıñ birinci künlerinde özlerini “selefiye” ya da “salafitler” diye tanıtqan fırqacı mefküresiniñ mensüpleri Aqmescit rayonınıñ baş imamı Enver efendi Baqiyevge ücüm etip, oña qol köterdiler. Ücüm aprel 1-de, cuma künü, Enver Baqiyev Aqmescit rayonınıñ Colman (Pionerskoye) köyünde öz vazifesini eda etkeni vaqıtta, özüni Aqmescit rayonındaki Kurtsı köyü camisiniñ “imamı” olaraq tanıtqan Akim İslâmov degen kişiniñ yolbaşçılığında olğan “salafitler” taqımı tarafından yapıldı.
Aprel 2 künü aynı şu camide ve aynı insanlar tarafından Qırım Müftisiniñ muavini Raim efendi Ğafarovğa da ücüm yapıldı.
Din erbaplarına qol kötermekten ğayrı, olarnıñ qorantalarına qarşı da tehditler yapıldı.
“Camige kelgenim vaqıt, meni başqa yerden kelip çıqqan, agressiv areketli bir taqım kişi bekley edi. Bu – Aqmescit rayonındaki Kurtsı camisiniñ cemaatından kişiler edi. Olar keçirecek namazımnı keçirmege bermediler, meni aqaretlep başladılar ve kâfirlikte qabaatladılar. Olar meni köteklediler – qolnen başıma urdılar, qollarımnı qayırdılar, teptiler. Bularnıñ episi cami cemaatınıñ közü ögünde oldı”, – dedi zararlanğan Enver Baqiyev.
Ücüm etkenler ananeviy İslâmğa ait olmağan, özlerine “selefiye” digen aqımnıñ tarafdarlarıdır. Aynı şu kişiler Colman köyü camisi cemaatınıñ azalarına evel de ücüm etken ediler, amma cezasız qalğan ediler.
Qırım Cumhuriyeti ve Sevastopol şeeri musulmanları diniy idaresi (Tavriya Müftiligi) şu vaqia boyunca öz tedqiqatını keçire ve uquqqoruyıcı organlarğa da, kerekli tedbirlerniñ alınması içün munasip arizalar yolladı.
QMDİ matbuat hızmeti